Diretora Ezekutiva Fundu Dezenvolvimentu Kapitál Umanu, Leila Cárceres dos Santos. Imajen/Julia Chatarina

DILI, 03 fevereiru 2020 (TATOLI) – Iha reuniaun ordiária Konsellu Ministru loron 29 fevereiru, ezekutivu sira aprova Dekretu-Lei ne’ebé aprezenta husi Ministru Ensinu Superior, Siénsia no Kultura, Longuinhos dos Santos, kona-ba regulamentu Fundu Dezenvolvimentu Kapitál Umanu (FDCH-sigla portugés), ne’ebé altera kompozisaun Konsellu Administrasaun atu bele inklui mós Ministériu Ensinu Superiór, Siénsia no Kultura (MESSK).

Diretora Ezekutiva Fundu Dezenvolvimentu Kapitál Umanu (FDCH-sigla portugés), Leila Cárceres dos Santos, esplika alterasaun ne’e hodi ajusta ho orgánika foun VIII Governu Konstitusionál.

“Alterasaun ida ne’e, nia kompozisaun ba Konsellu Administrasaun ne’e rasik hodi inklui Ministériu Ensinu Superiór, Siénsia no Kultura, ne’ebé agora sekretariadu tékniku tutela ba MESSK tuir orgánika VIII Governu, entaun FDCH tama iha ne’ebá”, tenik Diretora ne’e ba Agência TATOLI iha nia knaar fatin, Palásiu Governu, segunda ne’e.

Diretora ne’e dehan, kondisaun ida antes ne’e tanba uluk sekretariadu tékniku FDCH tutela iha Ministériu Planeamentu, Investimentu Estratéjiku, ne’ebé momentu ne’ebá lidera husi Kay Rala Xanana Gusmão hanesan ministru.

FDCH rasik iha Konsellu Administrasaun ne’ebé sai hanesan konsellu ne’ebé halibur Prezidente no membru sira.

“Ho nune’e, Konsellu Administrasaun nia prezidente agora Mak Ministru  Longuinhos dos Santos, nune’e bele halo funsaun nu’udár Konsellu Administrasaun  no nia membru laiha mudansa hamutuk membru na’in-lima mak nafatin, Ministra Finansa, Ministra Edukasaun, Juventude no Desportu, Ministru Justisa, Sekretariadu Estadu Formasaun Profisionál no Empregu no mós Ministru Petróliu no minerál”, nia akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here