The poet can’t change anything, but the poet can demonstrate the power of solitary conscience—Poeta nunka bele muda buat ida, maibé poeta bele hatudu poder solitáriu konsiénsia (Poeta Amerikanu, Stanley Kunitz).

DILI, 3 fevereiru 2020 (TATOLI)–Poeta, kompozitór no eskritór timoroan, Abe Barreto Soares, sempre hamanas no hamoris ahi poetiku liuhusi ninia atividade hakerek poema sira liuhusi Klibur Dadolin TARAKAMA (Foho Taroman, Ramelau, Kablaki no Matebian).

Liuhusi Klibur Estudu Neon Fuan no Isin (MSB Study CLUB) nia harii (2008), nia sempre hamutuk ho estudante sira hosi Departamentu Ingles (Universidade Nacional Timor Lorosa’e) sempre hahí no hanai vizaun no misaun atu uza múzika no poezia atu mout iha prosesu konstrusaun karater, konstrusaun nasaun, konstrusaun estadu no konstrusaun dame iha mundu rai-klaran.

Ho mehi ida ne’e mak nia hatán ba konvite hosi Xefe Komisaun Implementadór Festival Tegal Mas Island International Poetry (FTMIIP) iha Provinsia Lampung, Indonézia, poeta Isbedy Stiawan ZS, hodi reprezenta Timor-Leste iha festival ho eskala internasional ne’e.

Nia hetan konvite ne’e iha Novembru 2019 no nia hakmaan-aan ba partsipa abertura Festival Tegal Mas Island International Poetry ho tema “Tuhan, Pulau, Kata-Kata” (Maromak, Illeu Liafuan sira) iha Provinsia Lampung, Indonézia, iha Sesta (24 Janeiru 2020) no enseramentu ne’ebé hala’o iha Domingu (26 Janeiru 2020).

Atu hatene kle’an liu kona-ba ninia partisipasaun iha eventu ida ne’e, akompaña entrevista eskluzivu ne’ebé hala’o husi jornalista TATOLI, Cancio Ximenes, ho poeta timoroan, Abe Barreto Soares, ne’ebé hala’o iha Segunda (3 Fevereiru 2020), hanesan tuir mai ne’e.

Iha fulan janeiru nia rohan, ita-boot reprezenta Timor-Leste hodi ba tuir Festival Tegal Mas Island International Poetry iha Provinsia Lampung, Indonézia. Oinsá ita-boot nia partisipasaun iha festival refere? Bele esplika?

Ha’u partisipa iha Tegal Mas Island International Poetry iha Provinsia Lampung, Indonézia tanba hetan konvite hosi Komisaun Organizadora ne’ebé hala’o festival ida-ne’e iha fulan Novembru tinan 2019. Xefe Komisaun Implementadora Festival ne’e nian, poeta Isbedy Stiawan ZS, ne’ebe konesidu hanesan Papa Literatura iha Provinsia Lampung maka iha antusiazmu maka’as hakarak envolve Timor-Leste iha festival ho eskala internasional ida hanesan ne’e.

Ha’u hasoru nia antes ona iha festival literaria rua iha Indonézia ne’ebe ha’u partisipa hanesan poeta ida hosi Timor-Leste: a) Ubud Readers and Writers Festival, ne’ebé hala’o iha Ubud, Bali iha fulan Outubru, tinan 2007, no mos b) La Tansa International Literary Festival, ne’ebe hala’o iha Lebak, Banten, Java Osidental iha fulan Setembru, tinan 2019.

Konvite ba Timor-Leste ne’e hato’o ba ema na’in rua: konvite ida ba ha’u-nia aan rasik no konvite ida seluk ba ita-nia poetiza, Sandra Tilman. Maibé, tanba razaun familiár balun ne’ebé iha, ne’e duni mak Alin Sandra Tilman, to’o ikus, la iha posibilidade atu bele partisipa iha eventu boot ida-ne’e.

Iha festival ne’e, ha’u halo esforsu tomak atu partisipa ho ativu, iha kualker atividade sira maka hala’o tuir oráriu mak iha, hanesan aprezentasaun lee poezia, semináriu kona-ba poezia, paseiu no divertimentu kreativu, nomós workshop kona-ba prosesu hakerek kreativu, no seluk-seluk tan.

Tema prinsipál ne’ebé sira hili ba festival internasional ne’e saida?

Tema prinsipál ba Festival ne’e maka: “Tuhan, Pulau, Kata-Kata” (Maromak, Illeu Liafuan sira). Razaun ba komisaun organizadora atu hili tema ne’e tanba festival ne’e hala’o iha illeu ki’ikoan ida hanesan ita-nia illeu Jaco (Lautem-Lospalos). Sira hakarak promove illeu Tegal Mas ne’e hanesan fatin ne’ebé atrai mundu nasionál, rejionál no internasional iha aspetu turizmu nomós aspetu literáriu.

Oinsá ema-nia haree ba Timor-Leste nia partisipasaun liu-liu ita-boot nia partisipasaun iha festival refere?

Timor-Leste nia partisipasaun iha festival murak no furak ida-ne’e hetan atensaun makaas hosi partisipante sira. Timor-Leste lori nuansa foun no atrativu. Partisipante sira, liu-liu, hosi Indonézia iha saudades maka’as ba Timor-Leste tanba uluk Timor-Leste halo parte integral ida iha NKRI (Negara Kesatuan Republik Indonesia).

Timor-Leste nia prezensa lori anin-murak no klamar fraternidade liuhosi obra literária. Timor-Leste nia prezensa haklaken espiritu rekonsiliasaun entre Timor-Leste ho Indonézia.

Tuir Isbedy Stiawan ZS nia hanoin katak durante ne’e públiku literáriu hosi Indonézia laduun rona lian literáriu hosi Timor-Leste, ne’e duni maka bainhira lori Timor-Leste partisipa iha eventu ne’e, sei loke públiku sira-nia matan no neon kona-ba ezisténsia literatura Timor-Leste nian, ne’ebé uluk halo parte nu’udar provinsia ida Indonézia nian.

Iha biban ne’eba, ita-boot aprezenta poezia ho nia titulu saida de’it no tanbasá tenke lori poezia sira ne’e?

Ha’u aprezenta poezia sira hosi ita-nia poeta senior Timor-Leste nian sira durante forum formál, iha sesaun abertura no sesaun enseramentu:

a.) Xanana Gusmao: poema ida la ho titulu….”estou em guerra…” no mos poema ida fali ho titulu, Esperancas Rasgadas hosi nia livru Mar Meu, liuhosi lee no hananu (muzikalizasaun ba poema sira);

b.) Fernando Sylvan: poema ida ho titulu “Infancia” no poema ida fali la ho titulu ko’alia kona-ba funu, liuhosi lee no hananu.
Ha’u mos lee ha’u-nia poema ida rasik iha lian Indonézia hosi antolojia: TEGAL MAS ISLAND DALAM ANTOLOGI PUISI, ho titulu: “Membaca Tanda-Tanda Jaman”. Iha poema ne’e, ha’u ko’alia kona-ba esensia relasaun armonioza entre ita ema, Maromak no natureza.

Ha’u iha poema rua maka halo parte iha antolojia ida-ne’e: Membaca Tanda-Tanda Jaman no mós Suara Sang Guru di Bukit Tengkorak.

Ha’u buka atu promove Xanana Gusmão hanesan poeta boot kontemporaniu Timor-Leste nian ida iha festival ne’e, hodi nune’e, ema labele haree Xanana Gusmão meramente hanesan de’it politiku, eis gerrileiru ka eis prizoneiru ida, maibé hanesan mós jigante ida iha mundu literáriu Timor-Leste nian.

Iha sesaun informál ida ne’ebé hala’o iha LAMBAN SASTRA (UMA LITERATURA) Isbedy Stiawan ZS, hafoin tiha festival ramata, iha loron 27 Janeiru, maka ha’u buka atu promove (lee) mós poema ida hosi obra poetiza otas nurak Timor-Leste nian, Vitalia Ze, ho titulu, “Ba Ha’u-nia Feto Maluk Sira”, hosi livru antolojia poetika “SE MAK FETO BA O?” (obra poetika poeta Dadolin Murak no poetiza Vitalia Ze nian) ne’ebe lansa iha Dili, iha fulan Juñu tinan 2019.

Bele hatene, nasaun hira mak tuir festival ne’e?

Nasasun lima de’it mak, to’o ikus, bele konsege tuir festival ida-ne’e: Indonézia,Timor-Leste, India, Singapura no Malazia. Tuir loloos hamutuk nasaun sanulu (10) maka tuir. Nasaun lima seluk mak la konsege tuir maka: Australia, Brunai Darussalam, Korea, Tailandia no Vietnam.

Maske partisipante Australia la tuir iha festival ne’e fizikamente, maibé nia haruka nia obra poetika sira, ne’ebe halibur iha antolojia, “TEGAL MAS ISLAND Dalam Antologi Puisi”.

Depois, pelunenus partisipante na’in hira mak marka prezensa iha festival refere?

Tuir planu, komisaun organizadora konvida poeta 100 hosi nasaun sanulu maka temi tiha ona antes, atu tuir festival ne’e. Maibé tanba kondisaun la permiti, ne’e duni, poeta 60 resin de’it hanesan ne’e maka bele konsege partisipa iha eventu internasional ida-ne’e.

Sá mak ita boot sente hafoin tuir festival internasonal ida ne’e?

Nu’udar orgullu ida ba ha’u aan rasik, ha’u-nia família ki’ikoan (ha’u-nia kaben, no oan na’in rua), familia boot Barreto no Soares, Klibur Estudu Neon Fuan no Isin (MSB Study CLUB), ne’ebé ha’u harii hamutuk ho estudante sira hosi Departamentu Ingles, UNTL, iha tinan 2008 (ho vizaun no misaun: uza muzika no poezia atu mout iha prosesu konstrusaun karater, konstrusaun nasaun, konstrusaun estadu no konstrusaun dame iha mundu rai-klaran), nomós orgullu ida ba ita-nia rain Timor-Leste bainhira partisipa iha eventu literáriu ida-ne’e, iha Lampung, Illeu Sumatra, Indonézia.

Ha’u sente haksolok tanba poezia no muúika bele lori ha’u semo hosi rai ida ba rai ida seluk hodi partisipa iha festival literáriu sira, no selu-seluk tan. Iha prosesu ne’e, ha’u aprende no aprende konstantemente, kona-ba oinsa maka organiza eventu literáriu, hodi nune’e aban bain rua, Timor-Leste mós bele iha kbiit atu bele sai uma-na’in ba eventu literáriu ho eskala nasionál, rejionál no internasional.

Haree ba Tegal Mas Island, ne’ebé jere hosi emprezariu boot ida maka iha knaar boot tebes iha Tegal Mas Island International Poetry Festival, naran Tomas Azis Riska, hodi sai fatin destinasaun furak ba atividade literáriu no atividade turizmu sira seluk, ha’u imajina kedas ita-nia illeu Atauro.

Ha’u imajina oinsa maka iha kolaborasaun furak entre komunidade literáriu, emprezariu, no estadu atu bele promove turizmu iha rai laran no iha rai liur. Atu nune’e, ita bele diversifika ita-nia ekonomia Timor-Leste nian liuhosiu turizmu no la depende maka’as liu ba rendimentu ne’ebé ita hetan hosi mina no gas.

Ikus liu, pesoalmente, hanesan poeta, alias lia-na’in ida, ha’u sente onradu tebes tanba bele lori Timor-Leste nia naran halo morin iha mundu internasional iha aspetu kulturál, liu-liu aspetu literáriu (lee:poezia).

Ha’u fiar tebes ho fuan no laran tomak ba iha kbiit poezia nian atu halo mudansa, ho neneik, iha ita-nia moris, iha mundu rai klaran. Buat ne’e han malu loos kedas ho saida maka poeta Amerikanu, Stanley Kunitz, hatete iha nia liafuan sira:

“The poet can’t change anything, but the poet can demonstrate the power of solitary conscience—Poeta nunka bele muda buat ida, maibé poeta bele hatudu poder solitáriu konsiénsia.”

Jornalista : Cancio Ximenes

Editór      : Rafi Belo

HAKEREK NO HATÁN

Please enter your comment!
Please enter your name here