Sekretáriu Jerál Partidu CNRT, Francisco Kalbuadi Lay, entrega karta ba Prezidente Repúblika, Francisco Guterres Lú Olo. Imajen Tatoli/Egas Cristóvão

DILI, 02 fevereiru 2020 (TATOLI)–Prezidente Repúblika (PR), Francisco Guterres Lú Olo, rekoñese simu duni karta husi líder másimu Partidu Cogresso Nacional de Reconstrução de Timor (CNRT), Kay Rala Xanana Gusmão, maibé konteúdu husi karta ne’e Xefe Estadu labele fó-sai ba públiku (segredu). 

“Ha’u bele hateten momoos katak ha’u simu duni karta husi Kay Rala Xanana Gusmão ne’ebé haruka tuir Sekretáriu Jerál CNRT, Francisco Kalbuadi Lay, maibé ha’u hakarak atu hateten ba ita-boot sira katak konteúdu husi karta ne’e, úniku ha’u de’it maka bele hatene. Ha’u labele fó-sai ba ita-boot sira”, Prezidente Repúblika fó-sai asuntu ne’e, hafoin partisipa serimónia Komemorasaun Aniversáriu FALINTIL-Forsa Defeza Timor-Leste (F-FDTL) ba dala 19, iha Kuartél-Jenerál F-FDTL, Fatuhada, Dili ohin.

Prezidente Repúblika konsidera informasaun barak ne’ebé oras ne’e espalla iha públiku, sidadaun baibain ida mós halo komentáriu kona-ba saida maka nia hanoin, bele siik de’it ema-nia hanoin, nune’e, dala ruma mós ema balun bele lori to’o ba tebes.

“Maibé, ha’u hakarak husu ba ita-boot sira, husu ba povu tomak, atu lalika fiar boatus sira-ne’e. Problema ne’e iha ona ha’u-nia liman, husik ha’u maka rezolve”, aman nasaun apela.

Antes ne’e, Sekretáriu Jerál partidu CNRT, Francisco Kalbuadi Lay hateten, CNRT seidauk iha hanoin buat ruma, tanba sei rona uluk husi Prezidente Repúblika nia hanoin.

Opiniaun ne’ebé CNRT hato’o, pur-eskrita, no hein  evaluasaun husi Prezidente Repúblika tanba partidu hotu sei  hato’o idak-idak nia opiniaun, iha ámbitu diálogu nasionál ba solusaun impase polítika rai-laran ho Xefe Estadu.

Jornalista: Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here