Prezidente Repúblika, Francisco Guterres Lú Olo, bainhira halo diskursu iha selebrasaun Loron Proklamasaun Independénsia 28 Novembru 1975 ba dala-44, iha Palásiu Governu, kinta (28/11). Imajen Tatoli/Egas Cristovão

DILI, 02 fevereiru 2020 (TATOLI)–Xefe Estadu Francisco, Guterres Lú Olo fó omenajen ba militár sira hotu iha instituisaun FALINTIL-Forsa Defeza Timor-Leste (F-FDTL), ne’ebé integra-an iha instituisaun ne’e. 

Omenajen ne’e, Xefe Estadu hato’o liu husi diskursu serimónia Komemorasaun Aniversáriu FALINTIL-Forsas Defeza Timor-Leste ba dala 19, iha Kuartél-Jenerál F-FDTL, Fatuhada, Dili ohin.

“Ho onra boot tebes maka ha’u mai iha ne’e, hodi selebra hamutuk loron FALINTIL-FDTL ho ita-boot sira, nu’udar Prezidente Repúblika no Komandante Supremu. Tanba ne’e, hamutuk ho imi, ha’u hakarak hato’o hotu-hotu ninia respeitu no omenajen ba maluk militár sira hotu. Hamutuk ho imi, ita hanoin hikas sakrifísiu hosi ita-nia povu no hosi ita-nia Kombatente Libertasaun Nasionál”, xefe Estadu hato’o omenajen.

Iha diskursu ne’e mós Xefe Estadu hateten, memória, orgullu no barani maka lori ema hotu mai halibur ohin, iha fatin ida-ne’e, Forsa Armada no Timor-Leste.

“Ha’u hahú uluk ho saudasaun ba órgaun Estadu no hatutan mós ba imi ida-idak no, liuliu, ba membru hotu-hotu hosi FALINTIL-Forsas Defeza Timor-Leste, iha loron ohin, ita selebra hamutuk data harii ita-nia instituisaun militár. Ohin, ha’u hakarak saúda mós ita-nia asuwa’in Kombatente Libertasaun Nasionál tanba Nasaun ida-ne’e hamriik ho sira”, nia hato’o saudasaun.

Nu’udar Prezidente Repúblika no Komandante Supremu F-FDTL, Lú Olo hato’o kumprimentu ba militár hotu-hotu ne’ebé sei ativu hela iha instituisaun Forsa Defeza. PR Lu Olo fó parabéns ba profisionalizmu no dedikasaun tomak hodi serbí rai ida-ne’e, ba esforsu hakbesik-an ba sidadaun sira no tane-as rai ida-nee ninia interese nasionál.

Nia afirma, FALINTIL-FDTL harii tinan 19 liubá, presiza hanoin hikas kona-ba dalan naruk ne’ebé liu ona to’o ohinloron hodi buka komprende kona-ba dalan sira-ne’ebé instituisaun ne’e hili, hanoin kle’an kona-ba tempu ohin nian no oinsá hamutuk la’o bá-oin hodi hadi’a ba beibeik instituisaun ida-ne’e.

“Ita-nia luta libertasaun nasionál durante tinan ruanulu-resin-haat husik hela legadu ida nakonu ho aten-barani, domin ba pátria no sakrifísiu hosi jerasaun ida-ne’ebé hatene tuba rai metin, hatene tahan terus no hatene sakrifika-an tomak hodi luta ba objetivu ida de’it: Povu Timor-Leste tenke ukun rasik-an”, nia subliña.

Xefe Estadu konta tuir katak istória FALINTIL-FDTL nian kahur ho istória harii rai no identidade nasionál no nune’e, timoroan iha istória ida de’it. Istória ne’e maka istória luta ba independénsia no liberdade; istória ne’ebé glorioza FALINTIL halo ho ligasaun metin ba “povu no rai”, ba Komunidade no ba rai-lulik ne’ebé forsa hotu-hotu jura atu defende.

“Espíritu FALINTIL nian nakonu ho onra no glória. Legadu ida-ne’e maka sira husik mai ita. Tanba ne’e, importante tebe-tebes rekoñese no tane aas nafatin prinsípiu, valór no lisaun sira ne’ebé kombatente sira FALINTIL nian husik hela mai ita. Ita tenke hatutan legadu ida-ne’e ba jerasaun sira tuirmai, ba Ukun-na’in sira no sidadaun sira, ba profesór sira no estudante sira, ba inan-aman no oan sira”, xefe Estadu subliña tan.

Aman nasaun ne’e mós rekoñese katak, Timor-Leste, timoroan hotu-hotu nia obra. Nu’udar timoroan, iha devér atu fó onra ba ninia legadu no hatene oinsá uza legadu ne’e hodi lori rai ne’e ba futuru ida di’ak.

“Ita harii Timor-Leste nu’udar nasaun soberanu, ho Konstituisaun ida-ne’ebé haree duni ba dignidade ema nian no mós ba povu nia hakarak atu harii sosiedade ida-ne’ebé livre, justu no solidáriu. Ita hala’o hela prosesu atu hametin fronteira país nian; ita iha relasaun di’ak tebes ho povu ho kultura oinseluk; ita hetan ona respeitu hosi komunidade internasionál no haka’as-an hela hodi kontribui ba seguransa no pás iha mundu. Pátria ida-ne’ebé ita timoroan iha ohin, ho identidade rasik, hametin ho imi-nia konrtibuisaun, maluk militár sira. Ita-nia Forsa Armada, hosi hori uluk to’o ohin loron, hatene interpreta povu nia sentimentu no hakarak, no nune’e, hatene oinsá defende no garante Timor-Leste nu’ udar nasaun livre no independente”, PR hakotu.

Partisipa iha serimónia Komemorasaun ne’e, Eis-Titulár Órgaun Soberania, Membru Parlamentu Nasionál no Governu, Xefe Estadu-Maiór Jenerál FALINTIL-Forsa Defeza Timor-Leste, Embaixadór no Reprezentante Korpu Diplomátiku, Komandante Forsa Defeza Australiana Indo-Pacific, Endeavour Komodoro James McCormack, Veteranu no Kombatente Luta Libertasaun Nasionál no Konvidadu sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here