DILI, 02 fevereiru 2020 (TATOLI)- Forsa Defeza Nova Zelándia apresia ho progresu dezenvolvimentu no dezempeñamentu profisionál iha instituisaun FALINTIL-Forsa Defeza Timor-Leste (F-FDTL) durante tinan 19 nia laran.

Notísia Relevante : Komandu F-FDTL Promove Komandante Na’in Ualu Nia Diviza

Tenente Koronél Forsa Defeza Nova Zelándia, Martin Drasfield  dehan, durante tinan 2001-2002, Nova Zelándia hola parte iha misaun dame INTERFET Organizasaun Nasoins Unidas (ONU) too agora kontinua kapasita  membru F-FDTL iha área formasaun oin-oin, inklui koopera ho Forsa Defeza Austrália fó kapasitasaun ba membru F-FDTL sira atu prepara hala’o misaun dame iha ONU.

“Ami agradese durante ne’e haree ita nia forsa F-FDTL sira iha progresu makas, ami fó treinamentu ba F-FDTL iha kilat nian, lojístika no apoiu formasaun ba F-FDTL sira atu hola parte iha misaun ONU nian,” hateten Martin Drasfield ba Ajénsia TATOLI, ohin, hafoin partisipa serimónia aniversáriu transformasaun FALINTIL ba F-FDTL ba dala-19 (02 fevereiru 2001-2020) iha Kuartél Jenerál F-FDTL, Fatuhada, Dili.

Bazeia ba observasaun ne’ebé Nova Zelándia sira hala’o nota forsa F-FDTL servisu profisionál no membru F-FDTL barak ba tuir ona formasaun iha Austrália, Nova Zelándia, Portugál no nasaun seluk tan.

“Ha’u kontente no parabéns haree F-FDTL agora profisionál loos.  Nova Zelándia kontinua apoiu iha operasaun ba pás ONU nian no formasaun ba forsa espesiál,” nia hateten.

nia espera ba oin, membru F-FDTL sira ne’ebé sei hala’o misaun dame iha ONU bele fó kontribuisaun di’ak ba dezenvolvimentu Instituisaun F-FDTL.

Durante 2001 too 2002, Forsa Nova Zelándia nia tropa na’in lima (5) mate Timor-Leste. Tanba ne’e Estadu Nova Zelándia konsidera Timor-Lete hanesan nasaun maun-alin ne’ebé sei lori  povu rai rua hametin liután lasu kooperasaun  iha área defeza no seguransa.

Nia hatutan, família militár Nova Zelándia sira ne’ebé mate iha Timor-Leste deklara ona  sira nia kompromisu sei kontinua hamutuk ho povu no Governu Timor-Leste.

Jornalista : Eugénio Pereira   

Editór       : Francisco Simões                                          

HAKEREK NO HATÁN

Please enter your comment!
Please enter your name here