Prezidente Repúblika, Francisco Guterres Lú Olo. Imajen Tatoli/António Gonçalves

DILI, 02 fevereiru 2020 (TATOLI)–Xefe Estadu no Komandante Supremu FALINTIL-Forsa Defeza Timor-Leste (F-FDT), Francisco Guterres Lú Olo rekoñese katak instituisaun F-FDTL tenke hadi’a ninia kapasidade rekrutamentu no retensaun rekursu umanu. 

Rekoñesimentu ne’e Xefe Estadu hato’o liu husi diskursu serimónia Komemorasaun Aniversáriu FALINTIL-Forsa Defeza Timor-Leste ba dala 19, iha Kuartél-Jenerál F-FDTL, Fatuhada ,Dili ohin.

“FALINTIL-FDTL tenke hadi’a ninia kapasidade rekrutamentu no retensaun rekursu umanu. Atu halo ida-ne’e, FALINTIL-FDTL presiza tetu filafali ninia enkuadramentu legál hodi hasa’e liután membru Forsa Defeza nia dezempeñu, la haluha sira-ne’ebé fó sira-nia an tomak hodi serbí Timor-Leste, no bolu-tama mós ita-nia foin-sa’e sira atu hili profisaun militár hodi asegura sira-nia futuru”, PR Lu Olo hateten.

Xefe Estadu mós hateten katak, atu harii no dezenvolve instituisaun ne’e iha futuru, presiza prosesu no tempu naruk.

“Ha’u rekoñese katak harii Forsa Armada ida ba futuru tenke liu duni hosi prosesu naruk ida. Ita presiza aposta iha modelu ida-ne’ebé haree maka’as ba kestaun prontidaun no mobilidade meiu sira-nian no haree mós ba ekilíbriu entre kualidade no kuantidade husi kapasidade no meiu sira-nian”, nia rekoñese.

Nia hateten, hosi rekursu hotu-hotu, pesoál militár sira mak instituisaun militár nia rikusoin boot liu. Sidadaun ida-ne’ebé hili karreira sai militár no jura serbí nasaun, no prontu atu simu sakrifísiu ne’ebé de’it, inklui fó ninia vida rasik, la’ós sidadaun baibain ida. Sidadaun ida-ne’e, feto ka mane, simu katak kondisaun militár mak ne’e duni no simu ho laran hakmatek.

Ne’e duni, aman nasaun ne’e konsidera katak, importante tebe-tebes haburas polítika ida-ne’ebé valoriza timoroan sira ho padraun aas kona-ba formasaun, kualifikasaun no treinamentu, no fó dalan ba sira hakbesik-an beibeik ba komunidade iha territóriu tomak.

“Ita timoroan fiar no identifika-an ho ita-nia Forsa Armada nu’udar fatór afirmasaun ba ita-nia identidade no garante ba ita-nia independénsia nasionál no ba ita-nia koezaun, estabilidade no seguransa”, Xefe Estadu hakotu.

Antes ne’e, instituisaun F-FDTL loke ona rekrutamentu ba membru foun hamutuk 600, maibé provizoriamente komisaun rekrutamentu suspende prosesu tanba situasaun polítika rai-laran.

Partisipa iha serimónia Komemorasaun ne’e, Eis-Titulár Órgaun Soberania, Membru Parlamentu Nasionál no Governu, Xefe Estadu-Maiór Jenerál FALINTIL-Forsa Defeza Timor-Leste, Embaixadór no Reprezentante Korpu Diplomátiku, Komandante Forsa Defeza Australiana Indo-Pacific, Endeavour Komodoro James McCormack, Veteranu no Kombatente Luta Libertasaun Nasionál no konvidadu sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here