Ministru Reforma Lejizlativa no Asuntu Parlamentares, Fidelis Manuel Leite Magalhães. Imajen/Egas Cristovão

DILI, 01 fevereiru 2020 (TATOLI) – Ministru Koordenadór Asuntu Ekonómiku (MKAE) interinu no Ministru Reforma Lejizlativa no Asuntu Parlamentár (MRLAP), Fidelis Manuel Leite Magalhães, aprova ona planu asaun ba reforma sistema lisensiamentu atividade ekonómika sira.

Tuir komunikadu ne’ebé TATOLI asesu, ohin, hadi’a ambiente negósiu nian iha Timor-Leste, einjerál, hanesan kondisaun ida atu fasilita kriasaun no espansaun empreza sira, dezenvolvimentu ekonomia nian no kriasaun empregu.

“Ida-ne’e mai husi klasifikasaun sira país ne’e nian iha domíniu ida-ne’e no reklamasaun oioin ne’ebé mai husi operadór ekonómiku sira, ne’ebé reflete mós iha komunikasaun sosiál, kona-ba difikuldade ne’ebé sei eziste iha ita-nia país atu hahú no dezenvolve negósiu sira” refere nota imprensa ne’e.

Hodi dehan iha dalan atu rezolve difikuldade barak husi difikuldade hirak ne’e ho solusaun sira ne’ebé lais no hamenus burokrasia husi prosedimentu balu ne’ebé maka relasiona ho rejistu no lisensiamentu empreza nian, hamutuk ho avansu sira neebé maka nasaun ne’e atinje ona ho kriasaun Servisu Rejistu no Verifikasaun Emprezariál (SERVE,IP) no simplifikasaun ba lejizlasaun ne’ebé aplika.

Nune’e, mai husi estudu diagnóstiku ne’ebé SERVE halo ona, ho asisténsia téknika husi International Finance Corporation (IFC ka Korporasaun Finanseira Internasionál) no husi Ministru Reforma Lejizlativa no Asuntu Parlamentár durante 2019, kona-ba prosesu lisensiamentu ba atividade ekonómika sira iha Timor-Leste.

Hafoin estudu refere, Governu liuhusi MRLAP no MKAE kria ona grupu serbisu tékniku ida ho departamentu ne’ebé nia dirije hanesan MKAE, SERVE, TradeInvest no Ministériu Turizmu, Komérsiu no Ambiente no konvida ministériu relevante ba matéria ne’e mak Ministériu Finansa no Ministériu Agrikultura no Peska no reprezentante husi CCTL no FONGTIL.

“Grupu serbisu ninia mandatu mak atu analiza rezultadu sira husi estudu ne’ebé temi ona no aprezenta Planu Asaun ida ba tinan 2020, ho medida prátika no intervensaun lejizlativa no regulamentár sistematizada sira, hodi simplifika, hametin no halo sistema rejistu no lisensiamentu ba atividade ekonómika sira sai klaru no transparente liután”.

Atu garante kondisaun atendimentu sira ne’ebé moderna no adekuada liu ba sira ne’ebé uza ninia servisu, ne’ebé integra mós iha esforsu atu hadi’a ambiente institusionál ba negósiu sira iha país mak tempu badak sei inaugura instalasaun foun SERVE nian.

Edisaun : Maria Auxiliadora

HAKEREK NO HATÁN

Please enter your comment!
Please enter your name here