Diretór Diresaun Nasionál Organizasaun Urbana Ministériu Administrasaun Estatál, Hermínio Moniz Ribeiro. Imajen Tatoli/Julia Chatarina

DILI, 27 janeiru 2020 (TATOLI)–Diretór Nasionál Organizasaun Urbana iha Ministériu Administrasaun Estatál, Hermínio Moniz Ribeiro, hateten presiza baze legál balun molok estabelese Governu lokál iha munisípiu.

“Ko’alia kona-ba desentralizasaun, agora ita deskonsentra hela serbisu balun ba iha munisípiu. Tanba ne’e, bainhira tama ona iha faze desentraliazasaun signifika iha faze balun ne’ebé ita presiza finaliza”, dehan Hermínio ba Agência TATOLI iha nia knaar fatin, Caicoli, foin lalais ne’e.

Diretór ne’e realsa, baze legál mak presiza prepara lei kona-ba Asembleia ninian, Lei Eleisaun Munisipál, lei ne’ebé mak iha ligasaun ho suku sira nia kompeténsia, nune’e aban bainrua kuandu forma ona Governu lokál bele iha kompeténsia hodi hala’o sira nia podér rasik.

“Agora depende ba ezbosu lei ne’ebé mak ita prepara ba, signifika pre-kondisaun balun agora prepara hela liuhosi deskonsentrasaun, polítikamente mak ita tenke iha lei ona mak ita foin bele estabelese instituisaun iha lokál”, nia akresenta.

Diretór ne’e hatutan: “Tanba ne’e Lei Asembleia iha ona mak ita foin bele estabelese Asembleia iha ne’ebá no Lei kona-ba Eleisaun Munisipál iha ona mak ita foin bele halo eleisaun. Kuandu lei hirak-ne’e laiha, tantu estrutura seidauk bele hala’o”.

Lei Podér Lokál no Lei Eleisaun Munisipál ne’ebé iha ligasaun ba polítika desentralizasaun, daudaun ne’e tama ona iha Komisaun A (trata asuntu Justisa no Konstituisaun), maibé prosesu diskusaun sei depende tanba situasaun polítika atuál.

Preparasaun Polítika Desentralizasaun

Konseitu desentralizasaun rasik la’ós atu loke instituisaun barak iha munisípiu, maibé atu hakbesik Governu Sentrál ba Povu, tanba ne’e, presiza hakbiit liután rekursu umanu sira iha área administrasaun no jestaun.

Dezde tinan-2003 to’o agora, Governu halo preparasaun ba polítika desentalizasaun no halo sosializasaun molok implementa polítika desentralizasaun, bazea ba Konstituisaun RDTL artigu 72 no Planu Estratéjiku Dezenvolvimentu Nasionál (PEDN).

Artigu 72 konstituisaun RDTL hakerek kona-ba podér lokál iha alínea 1 haktuir, sei harii kbiit lokál ho ema koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian, kona-ba solusaun problema rasik iha sira-nia komunidade no atu promove dezenvolvimentu lokál no la afeta partisipasaun Estadu nian.

Nune’e mós, iha alínea 2 husi artigu hanesan hateten, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Antes ne’e, Governu anteriór fó ona delegasaun kompeténsia ba munisípiu haat hanesan Baucau, Bobonaro, Dili no Ermera.

Iha PEDN Kapítulu IV haktuir, desentralizasaun nia prinsípiu maka oinsá atu dezenvolve setór privadu, promove instituisaun sira ne’ebé forte no lejítimu iha nasaun tomak ho estável no mós iha oportunidade partisipasaun demokrátika.

Iha tinan-2016, Governu kontinua polítika desentralizasaun maibé la liuhosi eleisaun munisipál tanba lei laiha, ne’e duni Governu halo esforsu hodi kontinua preparasaun mak iha Dekretu Lei Nú: 3/2016 ne’ebé alteradu ho Dekretu Lei Nú. 9/2018, ne’ebé mensiona katak preparasaun sei liuhosi Deskonsentrasaun Administrativa, katak tau munisípiu hanesan administrasaun direta hosi Estadu.

Desentralizasaun Institusionál, hatúr munisípiu nu’udár administrasaun indireta hosi Estadu, no, Desentralizasaun Territoriál hatúr munisípiu sira nu’udár Governu lokál ida ho ninia Asembleia Munisipál.

Rezolusaun Apoiu Polítika Desentralizasaun

Iha loron 5 marsu 2019, VIII Governu Konstitusionál liuhosi enkontru Konsellu Ministru, aprova rezolusaun ida hodi apoiu polítika ba implementasaun desentralizasaun administrativa ba munisípiu sira seluk.

Ministériu Administrasaun Estatál submete rezolusaun ne’e hodi kesi ministériu ne’e ho ministériu relevante, hodi fó apoiu ba prosesu desentralizasaun hodi bele la’o ho efetivu, nune’e tinan haat to’o lima mai bele atinje objetivu podér lokál iha munisípiu sira tuir artigu 72 Konstituisaun.

Nune’e mós, iha aprezentasaun orsamentu 2020, Primeiru-Ministru, Taur Matan Ruak, afirma iha tinan ne’e, Governu prevee ona orsamentu atu fortifika polítika desentralizasaun administrativa.

Ba inisiativa ida-ne’e, Governu prevee ona millaun $3, ne’ebé destina atu prenxe vaga  sira ne’ebé ezistente iha mapa pesoál  husi Autoridade Munisipál  no administrasaun munisipál sira.

Aleinde ne’e, prevee mós millaun $9,4, ne’ebé destina  atu fó apoiu ba projetu oin-oin  ne’ebé Autoridade Munisipál  no Administrasaun Munisipál sira promove iha ámbitu Planu Dezenvolvimentu Integradu Munisipál (PDIM).

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here