Arsebispu Arkedioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão

DILI, 31 janeiru 2020 (TATOLI)–Arsebispu Arkedioseze Metropolitana Dili, Don Virgílio do Carmo da Silva hateten Igreja Timor Konvida ona Papa Francisco atu mai vizita Timor-Leste, maibé to’o oras ne’e, seidauk iha resposta ofisiál husi Vatikanu. 

Don Virgílio hato’o lia hirak-ne’e ba mídia, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

“Ita hotu hatene katak ita-nia Xefe Estadu rasik, nune’e mós husi Uma-Kreda hakerek ona karta konvida Amu Papa atu mai vizita ita-nia rai deben. Maibé, agora daudaun sei hein hela resposta ofisiál”, Arsebispu haktuir.

Ne’e duni, Bibi atan ne’e husu atu kontinua otimizmu no hein katak iha tempu badak pedidu ne’e bele hetan resposta ofisiál.

Antes ne’e, reprezentante Vatikanu iha Timor-Leste, Núnsiu Apostóliku, Monseñor Marco Sprizzi otimista katak Papa Francisco sei vizita Timor-Leste, maibé seidauk iha komunikasaun ofisiál.

Tanba ne’e, Monseñor Marco husu mós ba povu Timor-Leste, liuliu sarani Katólika, atu hein ho esperansa, konfiansa no otimizmu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here