DILI, 31 janeiru 2020 (TATOLI)–Governu Timor-Leste liuhusi Sekretáriu Estadu Komunikasaun Sosiál (SEKOMS), Mericio “Akara” Juvinal dos Reis, ohin, lansa Community Youtuber Timor-Leste (CYTL) ne’ebe kria husi juventude kreativu sira iha Timor-Leste.

“Ohin, ha’u mai reprezenta Oitavu Governu Konstitusionál mai lansa komunidade youtuber Timor-Leste ne’ebé inisiativa ne’e mai husi ita-nia juventude sira. Bainhira ha’u simu konvite ne’e, ha’u kontente loos tanba ita-nia joven sira iha inisiativa no kreatividade rasik atu kria komunidade ida ne’e,” dehan Merício “Akara” Juvinal dos Reis ba jornalista sira hafoin ramata lansamentu iha salaun Luta Hamutuk, Farol, Dili, ohin.

Nia hatutan, agora ne’e era dijitál ho plataforma online ne’e mak agora sai famozu. Tanba, nia dehan, nasaun viziñu sira aproveita plataforma online ne’e ba sira-nia ekonomia kreativu no ba sira-nia objetivu promosaun.

“Ha’u espera katak sira bele kolabora ho SEKOMS entermus de oinsa atu deskute kona-ba oinsa uza youtube hanesan plataforma ida halo promosaun ba ita-nia rain, ba ita-nia fatin turistiku no istoriku sira, no bele kria mós kampu trabalhu ba ita-nia joven sira,” nia dehan.

Tuir nia, bainhira youtuber ne’e ninia followers barak ona mak bele sai fontes rendimentu ba Komunidade Youtuber Timor-Leste rasik. Tan ne’e, nia apela, aproveita oportunidade sira ne’e atu bele hetan osan direta no rendimentu indireta bainhira halo promosaun.

Nune’e, nia reforsa, Governu nakloke ba inisiativa sira hanesan ne’e, liuliu komunidade Youtuber Timor-Leste ne’e para atu hahú kolabora mós ho Governu tanba Governu prontu atu sai parseria ho Komunidade Youtuber Timor-leste.

“Tanba ne’e mak ohin ha’u mós informa, agora daudaun Governu sei fó prioridade lai ba lei rádiudivuzaun atu regula kontiudu ne’ebé durante ne’e la’o iha Rádio no Televisaun maibé depois ba oin ita atu hahu haree lei kona-ba konteudu online. Ne’e mak ha’u husu ba Komunidade Youtuber para atu partisipa iha diskusaun sira kona-ba aspeitu legál,” nia hateten.

Iha parte seluk, Koordenadór Komunidade Youtuber Timor-Leste,  Abrao Monteiro infroma, kria grupu ida ne’e tanba durante tinan 10 resin ona, Timor-Leste sai hanesan utilizadór de’it ba iha plataforma online sira hanesan Google no Youtube.

“Ami harii grupu ida ne’e, para oinsa ita bele akumula ema sira ne’ebé uza internete, hanesan netizen liuliu iha youtuber para ita bele hetan benefisiu balun,” nia dehan.

Loloos, nia hatutan, agora daudaun Timor-Leste bele hetan ona benefisiu husi youtuber balun husi Timor-Leste maibé Timor-Leste seidauk iha dalan no halo parseria direita ho Google.

“Objetivu harii grupu ne’e, la’os atu hetan osan maibé pelumenus harii grupu ida ne’e para fahe informasaun ka fahe matenek ne’ebé ema ida-idak iha oituan ba ita-nia komunidade sira.

Nia informa, Grupu Komunidade Youtuber Timor-Leste daudaun ne’e eziste ho ninia estrutura hamutuk ema na’in 16 ne’ebé eleitu liuhusi asembleia.

Jornalista : Nelia Fernandes

Editó        : Rafy Belo

HAKEREK NO HATÁN

Please enter your comment!
Please enter your name here