DILI, 31 janeiru 2020 (TATOLI) – Iha periodu duodesimu fulan janeiru, tinan ne’e, Sekretária Estadu ba Asuntu Kombatente no Libertasaun Nasionál (SEACLN) prevee milaun $7 liu husi Fundu Transferénsia Públika hodi hala’o pagamentu ba pensaun veteranu no martir na’in rihun 27-resin iha territóriu.
Notísia Relevante : Verifikasaun Lista Naran Veteranu Pendente
Gil da Costa Monteiro ‘Oan Soro'”.Imajen/Antonio Goncalves
Sekretáriu Estadu Asuntu Kombatente no Libertasaun Nasional, Gil da Costa Monteiro ‘Oan Soro’ informa, SEACLN simu alokasaun Dotasaun Orsamentu Temporáriu (DOT) husi Ministériu Finansas hamutuk milaun $8-resin hodi ezekuta iha janeiru 2020 ba nesesidade kategoria bens servisu, saláriu vensimentu no transferénsia públika.
“Alokasaun barak liu milaun $7 ba transferénsia públika hodi atende pagamentu pensaun ba veteranu no martir sira iha janeiru ne’e,” informa Gil da Costa Monteiro ‘Oan Soro’, kinta (30/01/2020), hodi responde Ajénsia TATOLI iha nia servisu fatin, Caicoli, Dili.
Gil da Costa Oan Soro garante katak, maske enfrenta limitasaun orsamentu iha duodesimu, maibé la implika ba funsionamentu mákina estadu iha SEACLN.
Maske nune’e, Gil Oan Soro rekoñese programa foun SEACLN nian la bele implementa tuir alvu tanba natureza duodesimu la autoriza atu halo servisu ho programa foun. Ezemplu, la bele harii tan osóariu hodi tau restu mortais.
Jornalista : Nelson de Sousa
Editór : Francisco Simões
