Prezidente FC Porto Taibessi, Agotinho Nunes

DILI, 31 janeiru 2020 (TATOLI)–Prezidente FC Porto Taibessi, Agostinho Nunes hateten Porto Taibessi preparadu atu kompete iha Liga Futeból Amadora (LFA) époka 2020 ne’ebé sei realiza abríl mai ne’e.

“Porto Taibessi prepara nafatin atu kompete iha Liga époka 2020,” Agostinho ba Agéncia Tatoli via email, sesta ne’e.

Nia dehan, problema interna klube iha maibé estrutura klube sei tuur hamutuk hodi buka meiu oinsá atu rezolve.

“Porto Taibessi atu tuir ka lae ne’e tenke tuur hamutuk ho estrutura maka bele deside. Kona-ba alternativu, Porto Taibessi iha meiu balun atubele responde tuir kbiit klube nian, maibé depende ba jogadór sira tanba ita hatene katak maioria jogadór sira agora halai liubá osan,” nia dehan.

Maibé hanesan Prezidente Klube, nia kontinua hakbesik ba jogadór hotu atu konvensa nafatin jogadór sira atu hamutuk hodi reforsa klube refere maski iha krize finanseiru.

“Agora, Sekretaria Estadu Juventude no Desportu mós hapara ona subsídiu ba klube. Hanoin ida-ne’e mai ami problema uitoan tanba tenke selu jogadór sira, la hanesan uluk sira joga tuir de’it sira-nia vintade rasik. Entaun, klube sei buka alternatu ida para rezolve. Maibé, atu dehan de’it Porto kontinua partisipa iha Liga,” Agostinho tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here