Arsebispu Arkidioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão.

DILI, 31 janeiru 2020 (TATOLI)–Arsebispu Arkedioseze Metropolitana Dili, Don Virgílio do Carmo da Silva, enkoraja polítiku-na’in sira, nu’udar mós Sarani Katólika, atu barani rekoñese sala hodi kaer liman hamutuk harii unidade lori rai ne’e bá-oin. 

Arsebispu fó korajen ne’e, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

“Nu’udár timoroan, ita maioria Katóliku, inklui ita-nia polítiku sira mós nu’udar ema Katóliku, tenke hanoin no barani rekoñese sala. Uma-Kreda mós iha sentimentu ida de’it hakarak atu buat hotu halo di’ak de’it ba povu. Maski mosu diverjénsia polítika, maibé ita haka’as-an tau ba kotuk, kaer liman hamutuk, rekoñese buat ne’ebé la’o ona, maibé ita mós tenke barani atu bele rekoñese buat ne’ebé liu ona, barani hadi’a, barani rekopera buat ne’ebe la loos, atu ita bele la’o bá-oin. Ida-ne’e de’it maka ita hakarak”, Arsebispu husu.

Don Virgílio fó hanoin katak sarani ne’e dala barak ko’alia, halo sala, maibé mós tenke iha forsa atu simu buat ne’ebé la loos, atu bele kurije hodi hadi’a no bele lori nasaun la’o bá-oin.

“Tanba ne’e, Uma-Kreda kontinua konvida ukun-na’in sira atu haree ba povu ne’ebé kontinua halerik ba buat hotu. Ukun-na’in sira mós tenke hanoin katak sira hetan kadeira tanba povu maka lori ba hatuur iha ne’ebá. Tanba ne’e, bainhira tuur ona iha kadeira ne’e, ukun-na’in sira tenke buka nafatin atu hako’ak povu”, Bibi atan ne’e konvida.

Situasaun sira hanesan ne’e saida mak akontese, povu maka terus liu, povu maka kontinua sofre, nune’e, Uma-Kreda kontinua husu atu ukun-na’in sira kaer liman hamutuk harii nafatin unidade iha rai ida-ne’e.

Entretantu, iha hasoru-malu ho Prezidente Repúblika, Arsebispu Arkedioseze Metropolitana Dili, Don Virgílio do Carmo da Silva, SDB, akompañadu husi Bispu Dioseze Baucau, Don Basílio do Nascimento, Bispu Dioseze Maliana, Don Norberto do Amaral, Sekretáriu Ezekutivu Conferência Episcopál Timorense (CET), Padre Leandro María Alves, Vigáriu Episkopál ba asuntu Re-evanjelizasaun Arkedioseze Dili, Padre Juvito do Rego no Koordenadór Departamentu Jurídiku Dioseze Baucau, Padre Júlio Crispim Belo Ximenes.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here