DILI, 31 janeiru 2020 (TATOLI)–Diretór Nasionál Orsamentu no Jestaun Finanseira Ministériu Saúde (MS), Marcelo Amaral hateten, orsametu duodésimu iha fulan janeiru ba MS hamutuk millaun $3,6.

Orsametu duodésimu millaun $3,6 ne’e kompostu husi saláriu vensimentu, bens no servisu, transferénsia públika, no kapitál dezenvolvimentu.

”Orsamentu ba saláriu vensimentu mak boot liu ho montante hamutuk millaun $1,9, tuir mak bens servisu hamutuk rihun $878 itál, no transferénsia públika hamutuk rihun $858 itál no kapitál dezenvolvimentu mak ki’ik liu hamutuk rihun $2,500 de’it,” Marcelo Amaral ba dehan Agência TATOLI iha nia kna’ar fatin Ministériu Saúde, Caicoli, Dili, ohin.

Nia hatutan, ida ne’e mak distribuisaun kategoria ba iha Ministériu saúde iha fulan janeiru tinan 2020 ninian no baze kalkulasaun orsamentu ne’e mai husi tinan 2019 ba Ministériu Saúde.

”Orsamentu sira ne’e hahú distribui ona ba kada dirasaun iha Ministériu Saúde no iha dirasaun ne’ebé hetan orsamentu boot liu mak Diresaun Nasionál Saúde públika mak montante millaun $1,4,” Diretór Nasionál Orsamentu no Jestaun finanseira Ministériu Saúde, Marcelo Amaral informa .

Nia haklaken, orsamentu ne’e mós kobre hotu saláriu ba profisionál saúde sira iha Munisípiu 12 inklui RAEOA ho montante boot liu no dirasaun seluk ne’e orsamentu laduun boot tanba atu asegura de’it funsionamentu mákina organizasaun ninian.

“Orsamentu duodésimu ba saúde públika mak ba saláriu vensimentu hodi aloka ba Munisípiu sira liu-liu ba parteira, mediku, enfermeiru tekniku aliadu sira. Tuir mai mak bens servisu ne’e ba programa komprensivu kuidadu saúde primaria, programa saúde na familia no programa Siska no programa temátika sira seluk,” nia esplika

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here