Ministru Obra Públika, Salvador Soares dos Reis Pires. Imajen/Tatoli Egas Cristovão.

DILI, 31 janeiru 2020 (TATOLI) – Ministru Obra Publika, Salvador Eugénio Soares dos Reis Pires, hateten Ministériu Obra Públika (MOP) utiliza Dotasaun Orsamentál Temporária (DOT) hodi selu projetu sira ne’ebé maka la’o ona.

“Ami uza DOT ne’e hodi finansia projetu sira ne’ebé la’o ona, tanba rejime duodesimál ne’e la autoriza atu promove produtu foun tan ne’e rollover kontratu sira iha 2019 kuandu iha progresu. Ita-nia kompañia sira hatama fatura liuliu orsamentu iha liña ministériu nia okos ne’e ami bele selu uza DOT ne’e”, Ministru Salvador informa ba Tatoli iha Ministériu Finansa, Aitarak-laran, ohin.

Projetu sira ne’e maka hanesan; estrada rurál hamutuk pakote 66 ne’ebé agora daudaun implementa, no projetu bee-moos.

“Nune’e mós manutensaun ba drenajen sira iha kapitál Dili ne’ebé implementa hosi empreza Luliana”, Salvador afirma.

DOT janeiru ba MOP hamutuk millaun $12,619,881 fahe ba kategoria sira hanesan kapitál dezenvolvimentu millaun $1,405,000, sasán no serbisu millaun $10,704,774, saláriu no vensimentu millaun $426,774 no transferénsia publika, $83,333.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here