Adriano do Nascimento.

DILI, 31 janeiru 2020 (TATOLI)—Deputadu Bankada Parlamentár Partidu Demokrátiku (PD), Adriano do Nascimento husu líder nasionál sira tenke ko’alia didi’ak ba malu atu salva nasaun hosi inserteza polítika.

“PD nia hakarak salva uluk nasaun ne’e. Lalika ko’alia lai ba Eleisaun Antesipada (EA) tanba EA mós hanesan de’it. Partidu hira oan sei laiha ida mak manán maioria, mai maka buka malu fali”, Deputadu PD ne’e ko’alia ba jornalista, iha resintu Parlamentu Nasionál, ohin.

“Ami-nia preferénsia maka líder sira tenke ko’alia ba malu, koa’lia ho didi’ak salva uluk nasaun. Eleisaun Antesipada rai lai. Ne’e rekursu ikus. Ita hanesan timoroan ko’alia malu ba para salva nasaun ne’e katak osan tenke iha ba povu”, nia fó hanoin.

Nia argumenta katak oras ne’e emprezáriu sira hein hela osan, tusan barak no povu serbisu laiha tanba projetu laiha.

Deputadu Adriano afirma, demokrasia sim, maibé povu ho nasaun ne’e indiskutível. Demokrasia para responde povu ho nasaun nia moris. Demokrasia la’ós líder sira ho nia egoizmu la ko’alia ba malu, fila kotuk ba malu no depois ba de’it maka Eleisaun Antesipada.

Nia dehan, EA bele solusiona maibé rezultadu partidu sira sei buka malu nafatin forma Governu.

“Ha’u ta’uk maka eleisaun mai uitoan-uitoan depois fó kotuk ba malu nafatin de’it. Ita halo rekonsiliasaun ho Indonézia bele nusá maka Timor ho Timor labele halo rekonsiliasaun ba malu, enkuantu povu kontinua moris ho sofre”, Deputadu PD ne’e hateten.

Jornalista: Evaristo Soares Martins

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here