Tribunal Distritál Dili

DILI, 31 janeiru 2020 (TATOLI) – Dirijente loja Meimart, kinta (30/01/2020), ba hatán iha Tribunal Distritál Dili (TDD) hodi responsabiliza ba sira nia aktu krime fraude fiskál.

Diretór Empreza Meimart, Yunamei Mei ho nia Jerente Lin Hao, fó prejuizu ba Estadu Timor-Leste ho valor $895.82,00 tanba fa’an tua alkóliku la selu taxa.

Faktu ne’ebé aprezenta husi Ministériu Públiku (MP) ba Tribunal  katak dirijente Meimart  na’in rua; Yunamei Mei ho Lin Hao, ne’ebé notifikadu hanesan arguido, iha loron 13 juñu 2018, tuku 15h30 Otl, ekipa Autoridade Aduaneira hamutuk ho Autoridade Inspesaun no Fiskalizasaun Atividade Ekonómika, Sanitaria no Alimentár (AIFAESA) hala’o inspeksaun iha loja Meimart, ne’ebé lokaliza iha Audian, Suku Santa Cruz, Postu Administrativu Nain Feto, Munisípiu Dili.

Iha inspesaun ne’e, Autoridade Aduaneira (AA) ho AIFAESA halibur evidénsia lubun, liuliu be-vida sira ho kuantia barak no alkólika fa’an ilegálmente no la selu taxa ba Estadu tuir Lei mak vigora ona iha Timor-Leste. Nune’e, MP akuza arguido na’in rua nu’udar ko-autór material ho forma konsumada ba krime ida husi Fraude Fiskál, previstu no punidu iha artigu 314 no reforsa ho artigu 30 husi Kódigu Penal Timor-Leste.

Iha audiénsia julgamentu ne’e aprezenta mós Diretór Autoridade Aduaneira  (Alfándega), José Antonio Fatima Belo ho Diretór Nasional ida Ivo Manuel da Resurição Gomes.

Juíz koletiva Edite Palmira, Ivan Suriaty, ho estaziada Juiza ida  deside adia fali prosesu ne’e ba iha loron 02 fevereiru 2020, tuku 09:00 Otl, hodi rona alegasaun final husi prokuradór Jacinto Babo no defeza Fernando da Costa.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here