Governu-FAO Inaugura Tanke Bee Rua iha Eskola Cribas. Imajen/Natalino Costa.

MANATUTO, 31 janeiru 2020 (TATOLI) – Diretora Eskola Ensinu Primáriu Cribas, Juvita da Costa, hateten eskola ne’e menus sala de aula atu akumula estudante sira iha ámbitu prosesu aprendizajen.

“Ami iha ne’e sala ualu de’it, maibé alunu 700, obriga profesór ida tenke hanorin alunu sira na’in-50 iha kada aula, ba kestaun ne’e ha’u tenke fahe tiha sira ba turnu rua dadeer no loraik nian”, nia dehan ba Ajénsia TATOLI,  iha Cribas, kinta ne’e.

Ho sala ne’ebé la sufisiente, Juvita da Costa husu ba Ministériu Edukasaun Juventude no Desportu (MEJD), atu buka meiu sira hodi rezolve asuntu ida ne’e, nune’e estudante sira bele simu lisaun ho seguru iha sala laran inklui ekipamentu eskola nian hanesan armáriu, nune’e bele asegura dokumentu sira.

“Ami iha ne’e armáriu ida de’it, labele akumula dokumentu barak, entaun pasiénsia dokumentu sira balun ami tenke tau iha rai de’it. Uluk ami hato’o ona karta ba  ministériu atu husu apoiu fasilidade sira maibé seidauk iha resposta”, dehan.

Hatán ba preokupasaun ne’e, Ministra MEJD, Dulce de Jesus, hateten ministériu simu hotu ona informasaun sira ne’e hosi eskola iha territóriu tomak, maibé tuir ministériu iha ona planu infraestrutura edukativa atu hadi’a eskola sira ne’ebé ho kondisaun aat.

“Problema fasilidade sira ne’e la’ós mosu deit iha eskola ensinu basikú primariu Cribas, eskola barak maka sei enfreta hela  kondisaun liuliu eskola sira ne’ebé maka halo husi pakote referendu, tinan sanulu ona no tama ona iha planu ministériu nian nune’e tenke hadi’a”, nia salienta.

Maske iha ona planu, maibé ministra afirma sei haree ba orsamentu, no MEJD iha planu atu hadi’a eskola ne’ebé ho kondisaun aat ona hamutuk 1.811, liuliu eskola hirak ne’ebé ho kondisaun uma kakuluk dodok ona.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here