Prezidente Konferénsia Episkopál, Bispo Dioseze Maliana Don Norberto do Amaral akompanha husi Arcebispo ba Arquidiocese Metropolitana Dili, Virgílio do Carmo da Silva, SDB no Bispo Dioseze Baucau Dom Basílio do Nascimento. Imajen Tatoli/ Egas Cristóvão

DILI, 31 janeiru 2020 (TATOLI) – Arsebispu ba Arkedioseze Metropolitana Dili, Don Virgílio do Carmo da Silva, apela ba timoroan hotu atu labele pániku ho Virus Corona, maibé mak tenke kuidadu didi’ak ninia-an husi virus ne’e. 

“Ita labele pániku demais. Tanba ita hotu la hatene virus ne’e tama husi ne’ebé? Ema idaidak mak tenke hatene kuidadu ninia-an”, Don Virgílio apela hafoin hasoru malu ho Prezidente Repúblika, Francisco Guterres Lú Olo iha Palásiu Prezidensál Bairro Pité, sesta ne’e.

Don Virgílio hateten, tuir loloos parte ne’e hanesan kompeténsia Ministériu Saúde nian atu bele buka solusaun, maibé iha situasaun ida agora ema hotu tenke hatene kuidadu didi’ak idaidak nia-an iha ne’ebé de’it no presiza kuidadu saúde.

“Saúde iha ema idaidak nia limán”, Arsebispu akresenta.

Nune’e, Don Virgílio husu mós ba Governu atu buka meiu hodi aprende husi protokolu mundiál atu kontrola ema sira ne’ebé tama mai, liuliu sira-ne’ebé mai husi Wuhan Xina nune’e virus ne’e labele da’et to’o Timór.

Nia mós husu atu labele halo diskriminasaun hodi halo violénsia ba ema sira ne’ebé afeta ona ba Virus Corona maibé tenke respeita nafatin hodi tau iha karantina.

Antes ne’e, Brigada médiku xinéza iha Timor-Leste alerta ona ba timoroan hotu inklui xinéz sira iha Timor-Leste, atu bainhira hetan sintoma ruma kona-ba Virus Corona tenke izola-an iha uma laran durante loron 14 nia laran atu bele hatene loloos kona-ba moras ne’e.

Entretantu, iha loron hirak liubá, Ministru Negósiu Estranjeiru no Kooperasaun, Dionísio Babo Soares, apela ona ba timoroan hotu katak atu prevene Virus Corona timoroan hotu tenke kumpre giaun husi Organizasaun Mundiál Saúde (OMS).

Giaun ne’e mak hanesan fase liman bebeik, labele kaer liman arbiru ho ema seluk, no hadook-an husi ema ne’ebé me’ar.

Jornalista: Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here