Foto/Google.

DILI, 31 janeiru 2020 (TATOLI) – Banku Nasionál Komérsiu Timor-Leste (BNCTL, sigla portugés) planeia aplika seguru ba kréditu ho objetivu atu asegura liután kliente sira bainhira halo kréditu no hasoru difikuldade ruma durante kréditu ativu hela.

Prezidente Konsellu Administrasaun BNCTL, Brígido de Sousa, esplika seguru kréditu ou asuransi ba kréditu ne’e signifika katak foti kréditu iha BNCTL no banku halo kooperasaun ho kompañia seguru ne’e no selu prémiu ba empreza ne’e.

“Ezemplu, kréditu durante tinan 10 to’o dalan klaran buat ruma akontese, hanesan mate entaun kompañia seguru maka selu hotu ita-nia obrigasaun, nune’e ita-nia família labele lori todan ou bainhira empreza hapara ita-nia kontratu entaun durante tempu ne’ebé la serbisu ne’e kréditu ne’ebé ho banku kompañia maka selu”, Brígido de Sousa ba TATOLI iha Timor Plaza, foin lalais ne’e.

Kona-ba oinsá atu sosa prémiu hosi empreza seguru, Prezidente ne’e esplika kuandu foti kréditu iha banku ho montante rihun $10, entaun prémiu selu ba empreza ne’e $300 ne’ebé kréditu ne’e menus tiha $300 hodi selu ba empreza seguru ne’e atu antesipa situasaun sira ne’e.

“Banku seluk aplika ona, maibé haree liu ba ema ne’e mate, kona-ba lakon serbisu seidauk, depois ida tan bainhira serbisu maka hetan asidente ruma no labele halo knaar durante fulan haat no fatin ne’ebé hala’o serbisu ba deside la selu, entaun kompañia seguru ne’e maka prontu atu selu to’o rekupera”, afirma.

Nune’e, BNCTL planeia atu estabelese iha marsu tinan ne’e no seidauk bele publika sai empreza internasionál ne’e.

“Ami espera katak bele proteje liu ami-nia kliente sira maske ita tenke selu prémiu, maibé prevene katak bainhira mate labele husik hela tusan ba família ou oan sira, ema mai foti sasán”.

BNCTL mós promete katak bainhira aplika seguru ba kréditu, banku mós sei hatún jurus, tanba nia risku ne’e tun ona, no bele fó garantia ida katak kréditu ne’e seguru ona.

“Banku sei hatún jurus entre porsentu 2 to’o 3 para bele kobre fali prémiu ba asuransi atu iha balansu”, konklui.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here