Jogadór Academica FC, Tozy JR. Imajen/Espesiál

DILI, 30 janeiru 2020 (TATOLI) – Jogadór prinsipál Academica FC, Tozy JR seidauk hatene los nia distinu atu kontinua nafatin ho klube istimadu Universidade Nacional Timor Lorosa’e (UNTL) ka lae, maski époka 2020 besik ona.

Tanba ne’e, jogadór ne’e rasik seidauk iha hanoin atu partisipa iha époka dalimak, maibé nia kontinua hala’o treinamentu  hamutuk ho ninia amigu sira hosi klube Porto Taibessi, nune’e bele hametin liután abilidade no tekniku ne’ebé durante ne’e iha ona.

“Oras ne’e daudaun ha’u sei livre hosi tranferénsia no seidauk iha hanoin atu deside ha’u nia-aan atu bá ne’ebé. Agora hahú treinu jerál ho kolega sira iha kampu Portu Taibessi no oinsá prepara nafatin ha’u nia fíziku no abilidade sira, liuliu hadi’a nafatin ha’u nia-aan nu’udár jogadór ne’ebé bele responde iha kualkér jogu LFA ne’ebé sei realiza iha abríl mai ne’e”, dehan Tozy ba Agência TATOLI, kinta ne’e.

Nia dehan, iha klube balun mak halo kontaktu ho nia maibé jogadór ne’e rasik seidauk deside atu hamutuk ho klube ida.

“Iha ona klube balun ne’ebé komunika ho ha’u maibé ha’u seidauk deside ba klube ida-ne’ebe loos. Nu’dár atleta ha’u preparadu atu kontribui ha’u nia talentu bá kualkér klube hirak ne’ebé mak presiza ha’u nia kontribuisaun hodi reforsa klube ne’e”, nia akresenta.

Tozy hahú nia kareira nu’udár jogadór iha 2002 iha faze junior nian, enkuantu 2008 Tozy hahú hakat ba faze senior.

Ho nune’e, esperiensia ne’ebé sei naton, jogadór Manatuto-oan ne’e hala’o hela iha tinan sira ba kotuk.

Iha tinan 2018, Academica FC komesa tau matan ba nia hodi fó kontratu hodi bele reforsa klube refere.

Tozy nia prezensa iha Academica ho númeru kamizola 13, maibé iha 2019 sorte aat monu ba Academica tanba tenke husik primeira divizaun hodi tuun hikas bá segunda divizaun hamutuk ho Atletico Ultramar.

Maski iha ona segunda divizaun, Tozy ho fuan boot hateten: “Seidauk iha desizaun no oras ne’e seidauk iha kontratu foun husi klube seluk ba ha’u. Ha’u sei hanesan hela jogadór Academica, bainhira iha klube seluk lobi ha’u mak ha’u sente satisfaz, mak ha’u tenke husik ona Academica.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here