Sekretáriu Estadu Formasaun Profisionál no Empregu hala’o semináriu hodi lansa Relatóriu Peskiza Empreza no Abilidade 2019. Imajen/Florencio Miranda Ximenes.

DILI, 30 janeiru 2020 (TATOLI) – Rezultadu Peskiza  Empreza no Abilidade (PEA) 2019 husi Sekretáriu Estadu Formasaun Profisionál no Empregu (SEFOPE), liuhusi Sekretariadu Estratéjia Nasionál ba Empregu, hatudu taxa kreximentu empregu tun tebes ba porsentu 2.3% iha 2019 kompara ho 2017 ne’ebé ho totál 5.7%.

Tuir Peskiza ne’e husi SIMU-Web nu’udar baze-dadus ida ne’ebé Diresaun Nasionál Empregu Interiór no Empreza Esteriór uza hodi rejista iha 2019 hahú husi janeiru to’o dezembru, ema ne’ebé buka serbisu hamutuk 12.753, husi totál ne’e na’in-84 hetan ona serbisu iha rai-laran, 1.757 mak hetan empregu iha Austrália (Seasonal Worker Programme no Pacific Labour Scheme) no na’in-467 mak hetan empregu iha Koreia Súl.

Nune’e, dadus hatudu husi ema hirak ne’ebé dezempregu aas iha 2017 sa’e 1.953 to’o 12.753 iha tinan rua nia laran de’it, kreximentu dezempregu  rejistu sa’e maka’as liu. Enkuantu hetan serbisu ne’e 2.308 no la hetan serbisu 10.445.

Iha empreza 6.159 mak la’o iha setór komérsiu ekonomia nian, ne’ebé emprega ema na’in-53.663 husi mikro empreza ne’e kuaze 79% ho lokalizasaun iha Dili 55%. Kreximentu númeru empreza sa’e liu kompara ho 2017, infelizmente ne’e la refleta kreximentu empregu ne’ebé aas, maibé tun liu iha 2019.

Porsentu 79 husi emprega mak nu’udar mikro-empreza ho traballadór menus na’in-10. Dadus sujere katak iha redusaun uitoan ba empreza estranjeiru sira-nian husi 23% iha 2017 tun ba 22% iha tinan kotuk.

Setór rua husi atividade ekonómiku mak nafatin domina setór emprezariál iha Timor- Leste, hamutuk besik 80% husi empreza sira mak halai liu ba área konstrusaun no serbisu grosu, retallu no automotivu.

Setór atividade ekonómiku iha konstrusaun mesak ho totál 45%, maske ida ne’e redusaun ki’ik kompara ho 2017 ho totál 50%.  Serbisu grosu, retallu no automotivu ho totál 33%, ida ne’e kreximentu aas uitoan kompara ho 2017 ho 32%.

Nota katak tanba peskiza ida-ne’e foka liu ba empreza, entaun PEA la kaptura agrikultór subsisténsia ka traballadór ‘ba an rasik’, ne’ebé reprezenta proporsaun boot liu iha forsa traballu Timor-Leste nian.

Partisipasaun feto sira iha forsa traballu sa’e husi 24% iha 2017 ba 34% iha 2019 iha aumentu ba traballadór estranjeiru ne’ebé sa’e ein termu persentajen (9% iha 2017 no 11% iha 2019), maske nune’e ein termu númeru traballadór, ki’ik husi 6.465 iha 2017 ba 5.676 iha 2019.

Rezultadu peskiza hatudu mós korrelasaun pozitiva entre númeru empregu husi estranjeiru ne’ebé tun no saláriu médiu ne’ebé tun iha pozisaun jestór no profisionál sira.

Korrelasaun bele atribui la’ós de’it ba saláriu médiu ne’ebé menus, maibé bele mós atribui ba tamañu ekonómiku ne’ebé ki’ik iha períodu tinan refere.

Medida empreza sira-nia sa’e ba daudaun, maibé la tuir ho previzaun pozitivu iha 2017 katak empreza barak mak antesipa atu aumenta sira-nia rekrutamentu. Ho nune’e, iha 2019 kreximentu empreza sa’e ba 6.159 husi 5.229 iha 2017 maibé kriasaun postu traballu husi empreza sira ne’e tun tebes ho de’it totál 2.591 kompara ho totál kreximentu empregu 10.126 tuir rezultadu PEA 2017.

Maizumenus 52% husi kreximentu empregu nian mai husi kompañia sira ne’ebé foin harii, la hanesan ho rezultadu PEA ikus ne’ebé hatudu katak kreximentu empregu barak liu mai husi empreza ezistente sira.

Jeralmente, empregadu sira enfrenta saláriu tun, pur ezemplu pozisaun jestór tun husi 540 iha 2017 ba fali 504 iha 2019.

Kreximentu empreza aas akontese fora husi Dili no hatudu dominasaun setór konstrusaun nu’udar setór empregadór boot liu iha munisípiu sira seluk.

PEA ida-ne’e hatudu katak setór ekonómiku prinsipál tolu ne’ebé konsistente fó empregu ba traballadór barak liu mak; setór konstrusaun, setór komérsiu grosu no retallu, no setór serbisu alojamentu no hahán.

“Ami sei buka kontribuisaun hotu hodi dezenvolve polítika empregu no formasaun efetivu atu harii ita-nia forsa traballu ne’ebé kualifikadu hodi kompete iha merkadu traballu,” SEFOPE Julião da Silva, hafoin lansa relatóriu Peskiza Empreza no Abilidade 2019, iha salaun MSSI, Kaikoli, ohin.

SEFOPE hakarak hato’o nia agradesimentu ba empreza no parte SERVE,IP, Ministériu Finansa liuhusi Diresaun Jerál  Estatístika ba nia kontribuisaun ba peskiza atu hadi’ak ezatidaun peskiza nian no  agradese ba Programa Governasaun ba Dezenvolvimentu ka Governance for Development (GfD) husi Austrália ba apoiu téknika ba implementasaun peskiza ida ne’e.

Diretór Ezekutivu Sekretariadu Estratéjia Nasionál Empregu, , Aniceto Leto Soro, dehan PEA 2019, hatudu númeru dezempregu aumenta liga ba merkadu traballu tanba kualifikasaun ka ema buka serbisu barak liu kompara ho empregu.

“Ohin, peskiza hatudu katak ita-nia númeru dezempregu ne’ebé aumenta ba kada tinan, maibé merkadu traballu mós kada tinan menus, iha PEA rekomendasaun ba Governu no polítiku sira para foti asaun no polítika atu loke investimentu, kria kampu traballu no kontinua kapasita joven sira atu kompete iha merkadu traballu”, katak.

Númeru dezempregu ne’e mós kontribui husi kada tinan universidade sira fó graduasaun ba ema pur-volta 2000 to’o 5000 no ensinu sekundáriu sira ne’e rihun 12 to’o 20.

“Governu halo polítika oinsá para rezolve tiha númeru ne’ebé aumenta, ita tenke hamosu kampu traballu no investidór mós tenke aumenta para absorve ita-nia númeru joven sira iha indústria”, sujere.

Partisipa Lansamentu Peskiza Empreza no Abilidade 2019 ne’e husi Diretór Jerál Estatístika, MF, Elias dos Santos Ferreira, Diretór SERVE,IP, Florêncio Sanches, reprezentante Kámara Komérsiu Indústria Timor-Leste, dosente universidade sira no funsionáriu SEFOPE.

Jornalista : Florencio Miranda Ximenes  

Editora : Maria Auxiliadora

HAKEREK NO HATÁN

Please enter your comment!
Please enter your name here