Sekretáriu Estadu Formasaun Profisionál no Empregu, Julião da Silva. Imajen Tatoli.

DILI, 30 janeiru 2020 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, hateten iha tinan ne’e halo avaliasaun dezempeñu atubele orienta sentru formasaun sira ne’ebé ezistente hodi forma joven sira tuir nesesidade merkadu traballu ne’ebé iha rai-laran no li’ur.

“Ita presiza harii sentru formasaun barak di’ak liután, maibé tenke orienta ka forma joven sira tuir nesesidade merkadu indústria ne’ebé iha”, Julião da Silva hatene hafoin lansa relatóriu Peskiza Empreza no Abilidade 2019, iha salaun MSS Caicoli, ohin.

SEFOPE dehan orientasaun jerál ba sentru formasaun sira forma joven tuir duni nesesidade indústria, no prepara traballadór ho kualidade, maibé setór privadu la uza no investidór laiha atu emprega.

Hodi dehan sentru formasaun iha Timor-Leste kuaze 20-resin mak hetan ona akreditasaun no 70-resin rejistu iha maundobra.

Notísia relevante : Sentru Formasaun 74 Rejistadu Iha INDMO

Nune’e, nia dehan ba oin SEFOPE atu fó akreditasaun ba sentru formasaun sira la fó ona sertifikadu ka lisensa permanente, maibé tenke renova kada tinan rua ou tolu.

“Ita avalia karik sentru formasaun ne’e servisu la’o di’ak ka lae? No nia formadu na’in hira mak absorve ona iha merkadu traballu atu ita fó subsídiu mós la saugati”, katak.

Sobre traballadór timoroan bá estranjeiru, nia dehan kuandu taxa dezempregu aas no laiha setór privadu no investimentu, dalan úniku mak forma timoroan sira atu bá serbisu iha rai-li’ur.

“Ita forma tiha ona joven sira, mas kontinua ho dezempregu kualifikadu, mas agora ema la uza, setór privadu no investimentu menus ita buka dalan seluk atu ba rai-li’ur”, katak.

Nune’e, nia sujere ba sentru formasaun sira tenke tuir CNEFP ne’ebé forma joven tuir nesesidade indústria ho kualifikadu tebes atu asesu ba merkadu traballu.

Antes ne’e, Diretór Nasionál Sentru Nasionál Empregu Formasaun Profisionál Tibar (CNEFP-Tibar, sigla portugés), Simão Tito Barreto, hateten sentru formasaun Tibar kapasita ona timooan liuliu joven mane no feto hamutuk 5.000 iha área profisionál oin-oin.

Diretór CNEFP ne’e dehan totál formadu rihun 5 ne’ebé hetan sertifikadu profisionál ne’e iha kompeténsia no abilidade ona atu asesu ba merkadu traballu iha rai-laran no rai li’ur.

Hodi dehan formadu ne’ebé hetan ona sertifikadu profisionál ne’e kuaze porsentu 95 mak asesu ona ba postu traballu.

Totál formadu ne’e iha área espesializada lima hanesan eletrisidade, kanalizasaun, karpintaria, pedreiru no soldadura.

Formadu balun iha área agrikultura haree liubá ortikultura, re-florestasaun no kriasaun animál, iha mós ospitalidade, house kipping no food iha nivel I to’o nivel III. Iha área marítima ho jestaun portu, enerjia alternativa iha painél solár ho bio-gás ninian.

Diretór Simão Tito Barreto adianta hafoin formadu sira hetan graduasaun no simu sertifikadu profisionál CNEFP-Tibar kontinua akompaña no monitoriza to’o asesu ba postu traballu.

Notísia relevante : CNEFP-Tibar Forma Ona Joven 5.000

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here