Diretór Ezekutivu CI, Rigoberto Monteiro

DILI, 30 janeiru 2020 (TATOLI)-Prezidente Konsellu Imprensa (CI, sigla portugés), Virgilio Guterres nomea asesór ba Planu no Programasaun, Rigoberto Monteiro sai nu’udar Diretór Ezekutivu CI ho mandatu tinan rua, 2020 to’o 2022.

Tanba ne’e prezidente KI hato’o parabéns ba KI rasik, ba ezekutivu sira no diretór sira iha departamentu sira.

“Ha’u hein katak na’in hira sei fó kontribuisaun maka’as, liliu apoiu malu atu bele lori Konsellu Imprensa ba oin hanesan duni nia lema ka tema, atu promove liberdade imprensa, promove liberdade espresaun katak ita respeita ema-nia hanoin no mós garante ema liberdade ba ema atu bele hato’o sira-nia opiniaun,” Prezidente CI, Virgilio Guterres hateten, iha ámbitu tomada pose ba diretór ezekutivu CI, iha edifísiu CI, Kintál-boot, ohin.

Iha biban hanesan, emposadu Rigoberto Monteiro agradese ba Prezidente CI ho nian membru tomak CI ne’ebé fó konfiansa atu asume kargu Diretór Ezekutivu CI nian.

“Kargu ida ne’ebé ezije responsabilidade boot liután, ezije comitment (kompromisu) no dedikasaun ida boot liután, ezije kualidade profisionál, kapasidade téknika ne’ebé aas, ho esperiénsia serbisu ne’ebé iha, iha Konsellu Imprensa durante tinan haat, hanesan asesór planu, programasaun”.

Nia espera, sei la husik leet konfiansa ne’ebé atribui ba nia hodi asume responsabilidade ne’e. Nune’e mós, agradese ba funsionáriu tomak CI nian ba serbisu hamutuk no apoiu dezde CI harii iha 2016 to’o agora. “Espera katak comitment ne’ebé iha, sei kontinua ba períodu sira tuir mai, ita presiza atu kontinua hametin espiritu Timór ka ekipa traballu no haforsa liután ita-nia koordenasaun”.

Emposadu Rigoberto Monteiro mós husu apoiu husi konstituenti husi CI nian tomak, órgaun komunikasaun sosiál sira, organizasaun jornalista sira, parseiru importante sira, atu tuir mai kontinua haforsa relasaun institusionál ne’ebé iha tiha ona, pelumenus ho kooperasaun ne’ebé iha, bele hasoru dezafiu sira ne’ebé daudaun ne’e media hasoru iha nasaun.

Diretór Ezekutivu foun, Rigoberto Monteiro katak, iha okaziaun ida ne’e,  konvida kolega sira husi sosidade defisiénsia sira, mai husi organizasaun defisiente tomak iha Timor-Leste

“Konvida sira ho objetivu ida atu ita sosiedade media ni’an, liliu média sira no jornalista sira, atu iha publikasaun loroloron tau mós atensaun maka’as ba sira-nia asuntu. Media bele sai parte ida no sai kanál importante ba sosiedade defisiente sira hato’o sira-nia hanoin, nune’e ita hotu sei hamutuk promove sosiedade ida ne’ebé inklusivu iha ita-nia rain”.

Entretantu, iha serimónia tomada pose ne’e partisipa mós husi, Komisáriu KAK, Reprezentante SEKOMS (Sekretáriu Estadu Komunikasaun Sosiál), Sekretária Ezekutiva Komisaun Funsaun Públika (KFP), Prezidente TATOLI I.P, José da Costa, Prezidente TLPU, Manuel Pinto,  Diretór Ezekutivu Sentru Nasionál Chega, Hugo Fernandes, Reprezentante F-FDTL, Diretor Organizasaun Difisiente, organizasaun jornalista TLPU no AJTL.

Nune’e mós iha biban hanesan, fó bensaun ba Edifisiu foun CI nian, husi Pé. Abito José Brites Casimiro

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here