Primeiru-Ministru, Taur Matan Ruak. Imajen Tatoli/Egas Cristóvão

DILI, 30 janeiru 2020 (TATOLI)–Primeiru-Ministru (PM), Taur Matan Ruak atualiza preparasaun Governu kona-ba prevensaun virus Corona ne’ebé sai preokupasaun mundu nian.

“Enkontru semanál ho Prezidente Repúblika, informa kona-ba preparativu ita-nian, liuliu liga ho virus Corona. Ita-nia estudante sira iha fatin ne’ebé maka agora virus ne’e iha, haree hela posibilidade atu evakua sira mai iha Peking, Xina, no mós preparativu iha ita-nia rai-laran, oinsá ita bele iha kbiit atu halo buat ruma, karik akontese, ita bele minimiza ninia efeitu”, Taur ko’alia ba mídia, hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Iha loron 29 fulan ne’e, Konsellu Ministru aprova ona orsamentu millaun $1,5 ba akizisaun materiál Scan kona-ba deteta moras prevensaun primeiru sokoru evakuasaun ba estudante na’in-17 iha provínsia Wuhan, Xina.

Rezolusaun kona-ba orsamentu millaun $1,5 ne’e, aprezenta liuhusi enkontru liña ministeriál sira, ne’ebé hala’o iha loron hirak antes.

Molok ne’e mós, Brigada Médiku Xineza iha Timor Leste, alerta ona ba timoroan hotu inklui xineza sira iha Timor-Leste, atu bainhira hetan síntoma ruma kona-ba virus Corona, tenke izola-an iha uma-laran durante loron-14 nia laran atubele hatene loloos kona-ba moras ne’e.

Entretantu, iha loron hirak liubá, Ministru Negósiu Estranjeiru no Kooperasaun (MNEK), Dionísio da Costa Babo Soares mós apela ona ba timoroan hotu katak atu prevene virus Corona, timoroan hotu tenke kumpre giaun husi Organizasaun Mundiál Saúde (OMS).

Giaun ne’e mak hanesan fase liman beibeik, labele kaer liman arbiru ho ema seluk, hadook-an husi ema fanin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here