Kandidatu Ofisiál Inspetór Asistente polisia na’in 53 hasai fotografia hamutuk iha Sentru Formasaun Polisia, Comoro, Dili. Imajen/PNTL

DILI, 30 janeiru 2020 (TATOLI)- Komandu Polisia Nasionál Timor-Leste (PNTL) sesta aban (31/01/2020), koloka kandidatu Ofisiál Inspetór Asistente polisia na’in 53  hodi ba tuir treinamentu fíziku iha Sentru Treinamentu Rairobu, Postu Administrativu Atabae, Munisípiu Bobonaro.

Komandante Jerál PNTL, Komisáriu Faustino da Costa, dehan, membru sira ne’e presiza tuir treinamentu fíziku hodi kompleta sira nia kursu Promosaun ba Ofisiál Inspetór iha Sentru Akademia Formasaun Polisia (SFP), Comoro, Dili.

Kursu Promosaun ba Ofisiál Inspetór hanesan kursu dahuluk ne’ebé halo ba Ofisiál Inspetór Asistente ho durasaun fulan sia (9)  hodi aprende teoria no pratika iha terrenu tuir tempu ne’ebé determina atu bele kompleta antes sira hetan graduasaun iha loron 27 marsu 2020.

Membru Ofisiál Inspetór Asistente polisia na’in 53 tuir ona formasaun oin-oin hodi hasa’e sira nia rekursu atu servisu ho profisionál liután para kontribui ba dezenvolvimentu PNTL.

“Ha’u nia esperansa ba sira maka ne’e, bainhira kursu ne’e remata sira bele profisionál hanesan ofisiál polisia ida,” Komisáriu Faustino da Costa hateten ba jornalista sira, ohin, iha Dili.

Membru sira ne’e tuir formasaun iha Akademia Polisia Comoro hetan treinamentu husi Governu Portugál liu husi apoiu Guarda Nasionál Republikana (GNR).

Ba oin, Komandu PNTL sei kontinua promove diviza ba membru sira hodi hein estatutu foun no lei orgánika PNTL nian ne’ebé aprezenta ona ba Governu Timor-Leste hodi diskute iha Konsellu Ministru.

Notísia Relevante : KM Analiza Ona Estatutu Foun PNTL no Revee Lei Orgánika PNTL

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here