Núnsiu Apostóliku, Monseñor Marco Sprizzi, hala’o visita kortesia ho Primeiru Ministru, Taur Matan Ruak iha Palásiu Governu, Kinta (30/01). Imajen/António Gonçalves

DILI, 30 janeiru 2020 (TATOLI) – Núnsiu Apostóliku, Monseñor Marco Sprizzi, akompanña husi Ministru Negósiu Estranjeiru no Kooperasaun, Dionísio da Costa Babo Soares, halo vizita kortezia ida ba Primeiru-Ministru, Taur Matan Ruak.

Tuir Monseñor, iha kualkér situasaun, partikularmente iha situasaun ne’ebé demokrasia iha Timor-Leste iha momentu ezersísiu nia laran, importante atu hasa’e kresimentu país

“Vizita ohin nu’udár amizade ida no suporta. Dirijente polítiku iha instituisaun sira mak hili dalan atu rezolve, Santa Sé nunka intromente atu mete. Klaru sempre iha diálogu, kompreensaun mútua no haree saida mak di’ak ba país no povu. Ami nafatin enkoraja dirijente polítiku atu la’o iha dalan ida ne’e”, tenik Monseñor Marco iha Palásiu Governu, kinta ne’e.

Notísia Relevante: Governu Asina Subvensaun Annuál Millaun $10 ho Konferénsia Episkopál

Nia hatutan: “Iha aspeitu ida-ne’e ami la julga maibé iha serteza atu enkoraja dirijente polítiku Timor-Leste atu haree saida mak di’ak ba povu no bele iha entendimentu di’ak entre sira”.

Iha biban ne’e, Monseñor haktuir, iha vizita ne’e laiha deklarasaun espesiál ne’ebé halo ho Xefe Governu,  maibé hakarak afirma pozisaun Santa Sé desde estabelese akordu ho Estadu Timor-Leste.

“Santa Sé Vatikanu sempre aprosima desde iha akordu ho Estadu Timor-Leste no komesa suporta. Tanba ne’e ha’u mai manifesta apoiu no suporta husi Santu Padré Papa Francisco husi Santa Sé ba Estadu Timor-Leste”, nia akresenta.

Antes ne’e, Timor-Leste ho Santa Sé asina ona konkordata iha 14 agostu 2015, ne’ebé ko’alia kona-ba dezenvolvimentu iha Timor-Leste, liuliu  asuntu edukasaun.

Akordu ne’e ratifika liuhosi Rezolusaun Parlamentu Nasionál nú. 8/2015 11 novembru, ne’ebé prevee kontribuisaun annuál disponibilidade finanseiru Governu ba atividade sira ho karáter sosiál, edukativu no Governu Ekleziál Igreja Katólika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here