Jurista timoroan, Pe. Júlio Crispim Belo Ximenes. Imajen Tatoli/Egas Cristóvão

DILI, 30 janeiru 2020 (TATOLI)–Grupu Jurista Timoroan sira sujere ba Prezidente Repúblika (PR), Francisco Guterres Lú Olo, atu rezolve impase polítika ho buat rua maka hanesan, haree husi konstituisaun no polítika.

“Ami sujere ba Prezidente Repúblika, atu labele haree de’it husi parte konstituisaun, maibé konjuga rua ne’e hamutuk, atu fó solusaun ida-ne’ebé polítika no jurídika ba sitausaun ne’e”, Jurista Padre Júlio Crispim Belo Ximenes hato’o asuntu ne’e, hafoin hamutuk ho Grupu Jurista Timoroan hasoru-malu ho Prezidente Repúblika, iha Palásiu prezidente Nicolau Lobato, Bairru Pité, Dili, ohin.

Nia esplika, Prezidente Repúblika konvida Grupu Jurista Timoroan sira, atu fó mós sira-nia opiniaun jurídika konstitusionál ligadu ba sitausaun polítika atuál ne’ebé la’o hela iha rai ne’e, atu kontribui ba solusaun ne’ebé maka ideál liu, ne’ebé Prezidente Repúblika sei foti.

“Husi ami jurista, pozisaun maka ne’e, situasaun polítika hotu ne’ebé maka ita enfrenta, ninia dalan tenke hetan fatin iha konstituisaun. Ita bele tama husi konstituisaun hodi rezolve polítika, no ita mós bele tama husi polítika ba iha konstituisaun hodi rezolve problema. Rua ne’e hanesan osan moeda ida karik, sorin ida ho sorin ida seluk ne’ebé labele fahe malu. Labele haree de’it husi parte polítika no labele haree de’it husi konstituisaun, maibé rua ne’e tenke hetan fatin hotu iha ita-ninia solusaun”, nia esplika.

Grupu Jurista Timoroan sira mós aprezenta ona baze jurídika normativa ba Prezidente Repúblika, independentemente husi diskusaun públika sira ne’ebé iha, nune’e bele kontribui ba solusaun problema bazeia ba prinsípiu justisa, prinsípiu siguransa jurídika, ne’ebé maka Estadu ne’e iha.

“Ne’e duni, ami sei la espesífika ida-ida, maibé indikasaun sira ne’ebé iha, jurista sira aprezenta ona ba Prezidente Repúblika”, nia subliña.

Nia hatutan, situasaun polítika ne’ebé iha, depende ba faktu, faktu saida maka sai kauza ba ezijénsia solusaun jurídika no labele naran imajina sasán.

“Agora ita-nia faktu ne’e maka orsamentu laiha, entaun ita fó solusaun polítika no ita fó solusaun jurídika, atu Estadu ida-ne’e iha fali osan. Ida-ne’e maka ita-nia problema”, Pe. Júlio haklaken.

Grupu Jurista Timoroan sira ne’ebé hasoru-malu ho Prezidente Repúblika kompostu husi Jurista Padre Júlio Crispim Belo Ximenes, Manuel Tilman, Avelino Coelho, José Teixeira no José Guterres.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here