Sekretáriu Estadu Protesaun Sivíl, Alexandrino Xavier de Araújo, foto hamutuk ho Xefe Misaun IOM iha Timor-Leste, Wonesei Workington Sithole ho formandu sira. Imajen/ Mídia SEPS

DILI, 30 janeiru 2020 (TATOLI) – Organizasaun internasionál ba Migrasaun (IOM/International Organization for Migration) ho United States Agency International Development (USAid) fó formasaun ba pontu fokál Diresaun Nasionál Jestaun Risku Dezastre (DNGRD) no Korpu  Bombeiru husi munisípiu hotu kona-ba avaliasaun dadus dezastre naturál iha situasaun emerjénsia.

Formasaun ne’e hala’o iha salaun otél JL. Vila, Fatuhada, Dili, durante loron tolu, hahú husi loron 29 to’o loron 31 janeiru 2020.

Xefe ba misaun IOM iha Timor-Leste, Wonesei Workington Sithole hateten, liu husi programa redasaun risku dezastre harii komunidade ne’ebé reziliente iha Timor-Leste. Tanba ne’e, programa ne’e atu fó informasaun ba funsionáriu diresaun dezastre hodi aumenta liu-tan koñesimentu ba avaliasaun dadus dezastre naturál.

Sekretáriu Estadu Protesaun Sivíl, Alexandrino Xavier de Araújo, agradese ba kooperasaun husi ajénsia internasionál sira nian, ne’ebé durante ne’e di’ak tebes iha area protesaun sivíl.

Nia mós husu ba partisipante sira atu tuir formasaun ne’e ho didi’ak. Hodi nune’e, bele fó espasu ne’ebé di’ak liu-tan ba SEPS atu bele prepara bainhira enfrenta dezastre naturaís no fó atendimentu di’ak ba vítima ka komunidade sira.

Sekretáriu Estadu Alexandrino louva servisu tomak husi ekipa hotu fó atendimentu ba komunidade sira ne’ebé enfrenta situasaun emerjénsia dezástre naturál.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here