Ilustrasaun ONG. Imajen/deposit photo

DILI, 30 janeiru 2020 (TATOLI) – Portavóz Fórum Organizasaun Naun Governamentál (FONGTIL), Elisabeth Lino de Araújo, hateten situasaun impase polítika rai-laran la fó impaktu bá ezisténsia Organizasaun Naun Governamentál (ONG) sira bainhira hala’o knaar.

“Ami baibain tiha ona hanesan ativista, saláriu la iha mós ami la’o nafatin. Ami la depende ba Orsamentu Jerál Estadu, maibé Governu fó osan, ami la’o no la iha mós ami la’o nafatin. Ida-ne’e mak natureza ONG nian”, dehan portavoz ne’e, hafoin hasoru malu ho Prezidente Repúblika, Francisco Guterres Lú Olo iha Palásiu Prezidensiál, Bairro Pité, kinta ne’e.

Portavóz Sosiedade Sivíl ne’e nota, bainhira iha situasaun impase, impaktu direta sei bá povu ki’ik iha terrenu tanba dezenvolvimentu la la’o no ekonomia rai-laran hakdasak.

Antes ne’e, Diretór Ezekutivu FONGTIL, Daniel Santos do Carmo hateten, to’o outubru 2019 FONGTIL iha ona membru 339.

Nia informa, tuir dadus ne’ebé iha desde 1998, konsege iha membru ONG nasionál no internasionál to’o ukun-aan tinan 2002, iha membru hamutuk 856.

Diretór ne’e hateten, númeru ida-ne’e komesa tun tanba desde 2000 to’o ohin loron, timoroan sira ne’ebé harii ONG deside taka no la hala’o ona servisu tanba ajénsia internasionál ne’ebé fó apoiu husik Timór tanba enfrenta krize finanseiru mundiál iha 2006.

“Tanba ne’e, númeru ONG ne’ebé ita atualiza iha 2018 to’o outubru tinan ne’e, iha 339, maibé  husi númeru ne’e ONG internasionál hamutuk 27, nasionál no lokál hamutuk 312”, nia relata.

Kona-ba Fundu úniku ba FONGTIL, mai husi membru sira tanba kada tinan membru sira sempre selu bá sira nia kuota bá ONG nasionál no lokál sira kada tinan $60 no ONG internasionál sira kada tinan selu kuota $300.

Jornalista : Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here