Organizasaun Sosiedade Sivíl hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, kinta (30/01/2020). Imajen Tatoli/ Egas Cristóvão

DILI, 29 janeiru 2020 (TATOLI)–Sosiedade sivíl reprezenta husi Fórum Organizasaun Naun Governamentál Timor-Leste (FONGTIL), husu Prezidente Repúblika, Francisco Guterres Lú Olo, atu hakotu ona impase polítika ne’ebé iha tuir lei. 

“Ohin, ami husu de’it ba Prezidente Repúblika atu hakotu ona situasaun ne’e tuir lei, tanba situasaun ne’e ninia impaktu boot ba povu, iha ne’ebé ekonomia rai-laran la la’o”, portavóz FONGTIL, Elisabeth Lino de Araújo, hato’o lia hirak-ne’e, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

Nia esplika, sosiedade sivíl Fórum Organizasaun Naun Governamentál Timor-Leste (FONGTIL) no Rede Feto, ho membru sira, antes hasoru-malu ho Xefe Estadu, halo uluk diskusaun ho membru sosiedade sivíl nian husi munisípiu 12 inklui RAEOA iha edifísiu FONGTIL, Caicoli, iha loron 23 fulan ne’e.

“Ami nia prezensa iha-ne’e, la’ós partidu polítiku no ami mai la’ós atu fó opsaun ba Prezidente Repúblika, maibé ami mai atu fó ami-nia opiniaun kona-ba situasaun ekonómika povu nian no mós situasaun finansiál iha rai-laran, tanba ami serbisu diretamente ho povu iha terrenu. Ami durante ne’e rona lamentasaun barak husi povu no lamentasaun sira-ne’e maka ami mai hato’o ba Prezidente Repúblika”, nia konta tuir.

Tanba membru FONGTIL konsidera-an la’ós partidu polítiku ne’ebé hetan asentu iha Parlamentu Nasionál, nune’e, sosiedade sivíl sira-ne’e, deklara sira-nia pozisaun katak sosiedade sivíl fó apoiu tomak ba kualkér desizaun Prezidente Repúblika bazeia ba Konstituisaun Repúblika Demokrátika Timor-Leste.

Nune’e mós, Prezidente Rede Feto Timor-Leste, Judith Dias Ximenes reforsa katak ko’alia kona-ba lamentasaun povu nian iha terrenu liga ho impase ne’ebé iha, maioria halerik atu dezenvolvimentu no kreximentu ekonómiku tenke la’o.

Nia konta tuir katak, Rede Feto organiza kongresu nasionál feto nian, define prioridade sira husi munisípiu to’o nasionál katak edukasaun tenke ho kualidade, saúde tenke ho kualidade, tanba mortalidade inan ho oan sei aas, no edukasaun sei hakdasak liuliu labarik barak ho idade tinan 4 seidauk hatene lee. Tanba ne’e maka sosiedade sivíl husu ba Prezidente Repúblika atu oinsá maka asegura dezevolvimentu nasaun nian.

Sosiedade sivíl ne’ebé hasoru-malu ho Prezidente Repúblika, lidera husi Diretór Ezekutivu FONGTIL, Daniel Santos do Carmo, Prezidente Rede Feto Timor-Leste, Judith Dias Ximenes ho membru sira.

Tuir ajenda, aban (31/01/20), Prezidente Repúblika sei hala’o diálogu ho líder sira Igreja Katólika nian, kompostu husi Arsebispu Arkedioseze Metropolitana Dili, Don Virgílio do Carmo da Silva, SDB, Bispu Dioseze Baucau, Don Basílio do Nascimento no Bispu Dioseze Maliana, Don Norberto do Amaral.

Aleinde ne’e, sei hala’o mós diálogu ho líder sira hosi konfisaun relijioza sira mai husi Igreja Protestante, Musulmana, Hindu no Budista.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here