Evidensia mina-rai ilegál ne'ebé PNTL Munisípiu Bobonaro prende iha fronteira terrestre. Imajen/Dok. PNTL Bobonaro

DILI, 30 janeiru 2020 (TATOLI) – Tribunal Distritál Dili (TDD), kuarta (29/01/2020), hala’o audensia  julgamentu ba arguida na’in rua; OM ho VP ne’ebé komete krime kontra bandu iha artigu 316 no krime autoria iha artigu 30 kódigu penal Timor-Leste hodi hatama mina-rai ilegálmente  husi Palaka, Bobonaro mai Dili.

Arguida na’in rua nia atividade negósiu hatama mina-rai ne’e la iha koñesimentu husi Alfándega no la selu jurus (taxa) hodi fó prejuizu ba estadu Timor-Leste.

Faktu ne’ebé arrola husi Ministériu Públiku katak, iha loron 10 outubru 2018, iha Tasi Tolu, Dili, arguida na’in rua aluga karreta ho númeru matrikula 36.588 TL ho objetivu atu ba tula no sosa mina-rai husi JG iha Suku Palaca, Munisípiu Bobonaro, hodi transporta  mai Dili. Nune’e, arguida na’in rua hamutuk ho kondutór sai husi Tasi Tolu, tuku 19:00  Otl no to’o iha Palaca tuku 24:00 Otl.

Iha loron 11 outubru 2018, arguida na’in rua fó orientasaun ba ema balun no hahú hatama mina-rai iha karreta laran ho tonelada litru 2875  iha tuku  04:00 madrugada.

Bainhira hatama hotu tiha mina-rai hirak ne’e no hala’o daudaun viajen to’o iha Dili mak Autoridade Aduaneira (AA/Alfándega) halo apreensaun ba mina-rai hirak ne’ebé mak arguida na’in rua sosa ho valor $900.00.

Ho arguida nain rua nia hahalok mak Ministériu Públiku akuza ho krime Auditoria iha artigu 30 husi kódigu penal Timor-Leste kona-ba alínea 1, sai nu’udar autór sé maka ezekuta faktu husi nia duni ka liuhusi ema seluk maka hanaran hanesan instrumentu.

Alínea 2  nu’udar koautór sira kuandu husi akordu implísitu ka espresu hola parte direta iha ezekusaun ka haklisuk esforsu sira atu halo krime hanesan.

Arguida na’in rua mós komete krime 316 husi kódigu penal Timor-Leste kona-ba kontrabandu, katak 1 – Sé mak importa ka esporta rikusoin ka merkadoria sira la lori liu husi Alfándega sira ka kontrolu pasajen obrigatória seluk tama ka sai rikusoin ka merkadoria sira husi territóriu Timor-Leste nian, sei kondena ho pena prizaun husi tinan 2 to’o 6 ka kastigu selu osan.

Iha deklarasaun arguida Veronica Pereira, rekoñese katak faktu sira loos hotu no arguida OM hili dalan nonook de’it.

Iha alegasaun Ministériu Públiku la presiza rona ona sasin sira tanba arguida konfesa faktu loos hotu mak alega pena suspensaun no mina-rai litru 2.875 afavór ba estadu.

Audiénsia julgamentu ne’e prezide husi Juiz koletiva Antonio Fonseca, Afonso Carmona, Evangelino Belo, Ministériu Públiku reprezenta husi Prokuradór Adérito Tilman no arguida na’in rua hetan asisténsia legal husi Defensora Publika, Agostinha de Oliveira.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here