DILI, 28 janeiru 2020 (TATOLI)–Pro-Reitór Asuntu Akadémiku Universidade da Paz, Joaninho Xavier Hei informa, Universidade da Paz (UNPAZ) sei muda fakuldade Enjeñária ho Agríkola ba Munisípiu Liquiça.

“Agora Fakuldade rua mak atu muda ba Liquiça. Kampus satelit iha Liquiça mak Fakuldade Teknolojia Enjeñária no Agríkola, sei muda iha ne’eba. Ami iha ne’e bele mamuk ona. Sala sira ba prosesu aprendizazen ne’e iha entaun ami sei bele simu estudante foun to’o 3.000,” tenik Pro-Reitór Asuntu Akadémiku, Joaninho Xavier Hei ba Ajénsia TATOLI iha nia kna’ar fatin, ohin.

Razaun muda fakuldade rua ba Liquiça, nia hatán, Kampus satelit iha ne’eba boot ne’ebé ninia espasu bele akumula estudante barak.

“Iha ne’eba ekipamentus laboratóriu ba Fakuldade Enjinária Teknolojia Agríkola ne’e instala hotu iha ne’eba. Tanba ne’e, ami tenke muda fakuldadu rua refere ba munisípiu ne’eba,” nia dehan.

Nia reforsa, iha tinan kotuk, estudante sira tenke la’o husi ne’e ba ne’eba tanba ne’e parte universidade fasilita kareta no bus hodi tula estudante sira husi ne’e ba ne’eba hafoin iha lorokraik fila kedas.

“Ami kuaze bus lima ka ne’en lori estudante ba-mai Liquiça,” nia infroma.

Entretantu kona-ba planu atu simu estudante foun, nia haktuir, Universidade da Paz (UNPAZ) sei simu estudante foun hamutuk ema na’in 3.000 tanba fakuldade rua sei muda ba iha Liquiça.

“Prosesu aprendizazen iha ne’eba ne’e, agora ami-nia fatin iha ona entaun sira-nia sala durante uza ba prosesu aprendizazen sei mamuk. Ne’e mak ami sei aumenta tan atu simu estudante foun,” nia hateten.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here