Membru Bankada PD, Mariano Assanami Sabino. Imajen Tatoli/ Egas Cristóvão.

DILI, 29 janeiru 2020 (TATOLI)–Ligasaun Partidu Demokrátiku (PD) ho entidade hotu sempre di’ak tanba PD hakarak atu hamutuk lori Timor ne’e bá-oin. 

Prezidente PD, Mariano Assanami Sabino hato’o asuntu ne’e, hafoin lidera kuadru PD hasoru-malu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“PD ninia kontaktu ho entidade hotu, ne’e di’ak hotu kedas. Ho FRETILIN ami nia hún kedas. Ami mai husi ne’ebá. CNRT ami maka hamutuk hodi forma, la’o hamutuk tinan 15. Ho KHUNTO mós mesak maun-alin de’it mak iha ne’ebá. Ho PLP mós hanesan”, nia informa.

Tanba ne’e, nia dehan, PD maluk ba hotu-hotu, komunikasaun di’ak ba hotu-hotu, di’ak malu hotu-hotu, to’o líder nasionál sira, hanesan Kay Rala Xanana Gusmão, komunikasaun husi rezisténsia to’o ohin loron di’ak hotu.  Hanesan mós Marí Alkatiri, Taur Matan Ruak ho Ramos Horta.

Nia informa liután katak PD prontu atu salva situasaun. Sé de’it iha rai ne’e, atu partidu, individu, instituisaun naun formál sira, tenke hamutuk oinsá hadi’a filafali rai ne’e, dignifika fali rai ne’e, nune’e eleva tempu bá-oin. PD nunka laran moras ba ema ida. PD iha maka kontinua firme atu serbí.

“PD kaer luta-na’in sira-nia espíritu katak ba Timor laiha rezerva sakrifísiu. Karik presiza fó, PD prontu atu fó. Tanba ne’e, situasaun saida de’it mak Prezidente Repúblika (PR) sei foti, PD sei apoiu másimu ho responsabilidade. PD iha hanoin oioin, ideia oioin maibé sempre iha ida maka atu la’o bá-oin”, nia subliña tan.

Iha hasoru-malu ho Prezidente Repúblika, Prezidente PD akompañadu husi Sekretáriu Jerál, António da Conceição no membru Konsellu Polítika Nasionál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here