Prezidente PD no Atuál Deputadu Bankada PD, Mariano Assanami Sabino, dadalia ho mídia hafoin hala'o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, kuarta (29/01/2020). Imajen Tatoli/ Egas Cristóvão

DILI, 29 janeiru 2020 (TATOLI)–Partidu Demokrátiku (PD) hakarak atu líder polítiku sira tuur hamutuk halo diálogu nasionál atu buka solusaun ba impase polítika. Bainhira laiha ona dalan, últimu rekursu maka Eleisaun Antesipada (EA).
Prezidente PD, Mariano Assanami Sabino hato’o asuntu ne’e, hafoin lidera kuadru PD hasoru-malu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Assanami hateten, diálogu nasionál loke dalan atu hetan solusaun ba situasaun polítika atuál.

“Partidu Demokrátiku mai ho hanoin ida konxiente ba povu nia moris. Ho impase polítika ne’ebé la’o naruk husi 2017 to’o agora, PD hanoin katak ita hotu tenke tau-hanoin hamutuk, enérjia hamutuk, atu salva nasaun. Buka hadi’a filafali ita-nia relasaun, komunikasaun, tanba impase ne’e fó impaktu la’ós ona ba de’it ekonomia, maibé bá mós sosiál, kulturál no mós Timor nia oin iha mundu. Ida-ne’e maka ami hato’o ba Prezidente Republika,” nia haktuir.

“PD afirma nafatin katak PD sempre ho povu no rai ida-ne’e laiha rezerva. Maibé, ba PD, Eleisaun Antesipada ne’e tenke rekursu ikusliu. Tanba ita multipartidarizmu, nune’e, ita tenke hatene jere katak sei laiha partidu ida maka sai filafali manán maioria absoluta iha Eleisaun Antesipada”, Assanami hatutan.

Nia dehan, modelu diálogu ne’ebé PD propoin maka hanesan diálogu ne’ebé Prezidente Repúblika halo daudaun, rona ideia husi partidu polítiku hotu, maski idak-idak hato’o maibé Xefe Estadu sei sumariza hanoin hirak-ne’e.

Dalan seluk, Assanami tenik, ‘face to face’, oin ba oin ka hasoru-malu.

Tuir nia hanoin katak diálogu ne’e hanesan instrumentu kulturál ida, ne’ebé hafoin eleisaun ramata sempre iha diálogu.

“La’ós de’it iha palku polítika, ne’ebé bainhira kampaña hotu, diálogu mós hotu ona. Ne’e labele. Partidu balun bele ukun, balun ba opozisaun, maibé diálogu ne’e tenke kontinua”, nia subliña.

Asuntu prinsipál ne’ebé presiza diskute iha diálogu ne’e maka, primeiru tenke diskute povu nia moris. Segundu maka oinsá foti sa’e Timor-Leste tuir orgullu ne’ebé asuwa’in sira sakrifika sira nia-an ba ukun-an no presiza atu hakat tuir.

Ida seluk, Assanami salienta, maka tenke haree katak ho independénsia ba ekonomia petrodolar ne’e, oinsá maka Timor bele hakat ba ekonomia ida-ne’ebé maka bele sustenta nasaun, labele dependente ba minarai.

Ikusliu, nia husu katak rezultadu diálogu ne’e hein desizaun husi Prezidente Repúblika no PD prontu kolabora laiha rezerva.

Iha hasoru-malu ho Prezidente Repúblika, Prezidente PD akomopañadu husi Sekretáriu Jerál, António da Conceição no membru Konsellu Polítika Nasionál sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here