Prezidente Parlamentu Nasionál, Arão Noé de Jesus da Costa Amaral. Imajen/Tatoli

DILI, 29 janeiru 2020 (TATOLI)—Prezidente Parlamentu Nasionál (PN), Arão Noé de Jesus da Costa Amaral, hateten lei haat sai ajenda importante ba V Lejizlatura.

“Situasaun hanesan ne’e hela ita labele ko’alia prioridade. Ha’u dehan tiha ona lei sira ne’ebé pendente iha komisaun sira-nia liman maka Lei Antí Korrupsaun, Lei Podér Lokál, Lei Eleisaun Munisipál no Lei Kódigu Mineiru”, Arão Noé informa ba jornalista sira iha resintu Parlamentu Nasionál, kuarta ne’e.

Nia esplika, Lei Antí Korrupsaun oras ne’e sei iha prosesu debate kontinuasaun, ne’ebé pendente hela iha Komisaun A (Justisa no Konstitusionál).

Nune’e mós Lei Podér Lokál, Lei Eleisaun Munisipál foin tama ona Komisaun A, maibé prosesu diskusaun depende ba situasaun polítika atuál.

Prezidente PN ne’e hatutan, Lei Podér Lokál no Lei Eleisaun Munisipál iha ligasaun ba polítika desentralizasaun.

“Ha’u hein katak komisaun sira bele aselera para bele lori mai plenária aprova”, Prezidente Parlamentu Nasionál afirma.

Arão Noé espera katak situasaun polítika rai-laran bele hetan solusaun lalais nune’e diskusaun lei hirak-ne’e avansa bá-oin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here