Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 29 janeiru 2020 (TATOLI)—Prezidente Parlamentu Nasionál, Arão Noé de Jesus da Costa Amaral, hateten bainhira orsamentu duodésimu la sufisiente sustenta mákina Estadu, Governu bele hola inisiativa husu autorizasaun ba Parlamentu Nasionál (PN), nune’e Parlamentu bele halo lei autorizasaun levantamentu ba Fundu Petrolíferu.

“Se Governu presiza orsamentu urjénsia para kontinua, Governu bele husu pedidu mai Parlamentu Nasionál, Parlamentu bele halo lei ida hodi autoriza Governu atu halo levantamentu Fundu Petrolíferu kobre duodésimu nian”, Arão Noé informa ba jornalista sira, iha Parlamentu Nasionál, kuarta ne’e.

Maibé, tuir nia, Governu maka iha kompeténsia jere Dotasaun Orsamentál Temporária (DOT) ka orsamentu duodésimu ne’e.

“Ne’e kabe ba Governu, katak orsamentu iha kabimentu ka lae. Se laiha orsamentu, Primeiru-Ministru bele hola inisiativa ida haruka mai Parlamentu oinsá aprova foti osan hosi fundu minarai para kobre ida-ne’e. Ne’e bele. Importante Parlamentu Nasionál tenke aprova”, Arão Noé tenik.

Nia hatutan, se fundu rezerva hotu ona labele halo buat ida. Ne’e só autorizasaun Parlamentu nian para halo levantamentu hodi kobre orsamentu duodésimu.

Arão haktuir, se saldu 2019 nian hela millaun $200-resin, entaun bazeia ba predisaun ne’e gasta ba fulan-rua, maibé se la sufisiente entaun Governu bele husu autorizasaun ba Parlamentu Nasionál.

Prezidente Parlamentu Nasionál ne’e fó ezemplu, iha nasaun seluk moris ho impostu no kobransa hosi impostu ne’e bele kobre ona orsamentu duodésimu.

“Maibé ita-nian, lae. Ita-nia orsamentu depende ba Fundu Petrolíferu. Tuir lei Fundu Petrolíferu katak osan ne’e só bele foti liuhosi Orsamentu Jerál Estadu ka hanesan lei ida uluk foti millaun $650 sosa asaun kompañia rua ninian”, nia esplika.

Purtantu, Prezidente Komisaun C (Finansa Públika), Maria Fernanda Lay, argumenta ho ezekusaun to’o 31 dezembru 2019, Doatação Tudo Governo gasta de’it %81,6.

“Ita sei iha millaun $28 iha ne’ebá. Tanba ne’e, la loos dehan osan laiha. Rejime duodesimál iha 2017 ita la’o kuaze tinan-ida. Bainhira osan laiha, Parlamentu autoriza ita foti osan hosi fundu se kazu emerjénsia”, Deputada Lay dehan liuhosi plenária, horisehik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here