DILI, 29 janeiru 2020 (TATOLI)–Ministériu Saúde liu husi Hospitál Nasionál Guido Valadares hala’o Serimónia Asinatura Termu Aseitasaun Ba Rekrutamentu Públiku Profisionál Saúde sira hanesan enfermeiru, parteira, farmasista no asistente enfermajen.

Diretór Ezekutivu Hospital Nasional Guido Valadares (HNGV), Aniceto Barreto iha nia diskursu hatutan, iha funsionáriu foun ne’ebé mak pasa hamutuk ema na’in 42 no parteira ema na’in 13, farmasia na’in neen (6) no asistente enfermajen ema na’in 17 ne’ebé kualifikadu.

“Iha karreira etapa ida-idak nia funsaun instituisaun ida-idak buka ema ne’ebé mak kualifikadu. Hodi nune’e, bele ezerse ninia kontribuisaun ba dezenvolvimentu nasionál iha instituisaun ne’ebé de’it inklui iha Hospitál Nasional Guido Valadares,” Diretór Ezekutivu HNGV, Aniceto Barreto, hato’o liuhusi ninia diskursu, ohin.

Iha tinan-2018, nia infroma, HNGV tau planu bazeia ba razaun husi enfermeiru, pasiente no doutór sira katak to’o agora seidauk priense rasiu normál ba nesesidade atu nune’e bele fó atendimentu ne’ebé mak di’ak ba pasiente sira.

“Iha 2018 ita rekruta ema na’in 70 iha área la hanesan. Ba enfermaria nian, tuir nia, HNGV presiza ema na’in 30, parteira prezisa ema na’in 12, farmasia presiza ema na’in neen (6), enfermeiru presiza ema na’in 22 ho totál aplikante ne’ebé hatama dokuemntus hamutuk ema na’in 1.088,” nia dehan.

Nia informa, husi rekerente ne’ebé hatama dokumentu hamutuk nema na’in 1.088 maibé iha ema na’in 602 mak konsege priense administrativamente no ema rihun ho balun mak la liu tanba hakerek dokumentu de’it seidauk loos no di’ak.

Husi totál ema na’in 602 refere ne’ebé tuir ezame eskrita ne’e, nia esplika, só ema na’in 49 de’it mak bele pasa hodi uza sistema dijitál ne’ebé mak Komisaun Funsaun Publika (KFP) implementa.

“Husi ema na’in 49 ne’ebé mak tuir ezame eskrita no ikus liu iha ema na’in 42 de’it mak bele pasa iha ezame entrevista nian. Entaun, ita iha ema na’in 42 funsionáriu foun ne’ebé mak agora ita atu halo tomada de pose ba sira,” nia dehan.

Entretantu, partisipante sira ne’ebé iha serimónia asinatura termu aseitasaun ba rekrutamentu públiku Profisionál Saúde ne’e partisipa husi Prezidente Komisaun Funsaun Públika, Reprezentante Ministériu Saúde Diretór Polítika Kooperasaun, inan aman husi empozadu/a sira inklui Profisionál Saúde sira iha HNGV.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here