Prezidente PUDD no Atuál Prezidente Bankada PUDD, António de Sá Benevides, dadalia ho Jornalista sira hafoin hala'o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, kuarta (29/01/2020). Imajen Tatoli/ Egas Cristóvão

DILI, 29 janeiru 2020 (TATOLI)–Hafoin enkontru ho Prezidente Repúblika (PR), Francisco Guterres Lú Olo, Prezidente Partidu Unidade Dezenvolvimentu Demokrátiku (PUDD), António de Sá Benevides hateten kualkér desizaun ne’ebé Xefe Estadu foti atu solusiona impase polítika, ida-ne’e maka PUDD nia desizaun. 

“Agradese tanba ohin loron ita hamutuk iha-ne’e, inklui partidu hotu-hotu mai hodi rona, ami mós sujere ba Prezidente Repúblika katak diálogu la’ós maka ida-ne’e de’it, la’ós dalan ida de’it, Prezidente presiza rona beibeik tan, rona dala rua, dala tolu, husi partidu polítiku sira, depois maka foti desizaun. Kualkér desizaun ne’ebé maka Prezidente foti, ida-ne’e mak ami-nia opsaun”, António deklara ba mídia iha Palásiu Prezidente Nicolau Lobato, Bairru Pité, Dili, ohin.

Nia hatutan, hanesan partidu polítiku, PUDD hato’o mós ba Prezidente Repúblika ko’alia kona-ba diálogu ne’e nu’udár ‘o pão nosso de cada dia’, hanesan paun loron-loron nian, paun ne’ebé deputadu sira temi beibeik no hakilar beibeik iha Parlamentu.

“Ami husu hakarak diálogu, maibé kualkér desizaun ne’ebé Prezidente Repúblika foti, ida-ne’e maka ami-nia opsaun. Bainhira hala’o diálogu beibeik, mai ho fuan, mai ho intensaun di’ak, sei bele hetan ninia solusaun di’ak”, nia subliña.

António esplika tan, PUDD kaer metin mós liafuan ne’ebé Primeiru-Ministru, Taur Matan Ruak hato’o tiha ona katak, iha kadeadu, iha xave, ho nia sentidu katak iha problema iha solusaun.

“Ohin ami mós aumenta tan ba Prezidente Repúblika katak kadeadu boot tenke loke ho xave boot no kadeadu ki’ik tenke loke ho xave ki’ik”, nia reforsa.

Iha enkontru ho Prezidente Repúblika, Prezidente PUDD, António de Sá Benevides akompañadu husi kuadru sira.

Tuir ajenda, aban (30/01/2020), Prezidente Repúblika sei rona mós opiniaun husi grupu jurista timoroan no Fórum Organizasaun Naun Governamentál Timor-Leste (FONGTIL).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here