Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, kuarta (19/02). Imajen Tatoli/Egas Cristovão

DILI, 29 janeiru 2020 (TATOLI) – Ministru Petróliu no Minerál ein ezersísiu, Hermenegildo Augusto Cabral Pereira, hamutuk ho ekipa Autoridade Nasionál Petróliu no Minerál (ANPM), aprezenta Proposta Rezolusaun Governu kona-ba alargamentu área Bloku A no C Onshore (área tasi lolon ba rai-maran) no altera parsialmente Rezolusaun Governu númeru 2 39/2016, 23 novembru.

Rezolusaun ne’e aprova hodi fó dalan ba dezenvolvimentu no esplorasaun iha área ne’ebé mak besik malu hanesan Bloku A no C, ne’ebé mak identifika ona indísiu ezisténsia formasaun jeolójika ho potensiál ba dezenvolvimentu no esplorasaun.

Bloku A iha munisípiu Covalima no Maliana, enkuantu Bloku C iha munisípiu Manufahi ho Ainaro ne’ebé halo parte ona iha rejime kontratu ne’ebé fahe hosi produsaun ba Timor Resources Pty Ltd, ne’ebé hanesan empreza australiana ida ne’ebé hola parte hosi Nepean Group.

“Husi ANPM ne’ebé ita tutela ba Ministériu Petróliu no Minerál, aprezenta no hetan aprovasaun husi Konsellu Ministru atu halo alargamentu ba área esplorasaun onshore ninian. Bloku A no C, ne’ebé Timor Resources hahú iha Suai rasik no agora la’o di’ak de’it, no husu atu halo alargamentu ba bloku sira ne’e”, tenik Ministru Hermenegildo iha Palásiu Governu, hafoin reuniaun ezekutivu, kuarta ne’e.

Antes ne’e, ekipa tékniku sira halo ona peskiza jeofízika ho sistema sízmiku no magnétiku ne’ebé ekonomikamente no téknikamente viavel atu halo perfurasaun.

Ho razaun ida ne’e, Governu deside alarga perfurasaun ba área potensiál sira iha bloku rua ne’e.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here