Prezidente Sensu Agríkola 2019, Elias dos Santos Ferreira. Imajen/Jogerjo Guterres.

DILI, 29 janeiru 2020 (TATOLI) – Prezidente Komité Tékniku Sensu Agrikultura 2019, Elias dos Santos Ferreira, hateten sei koodena ho Ministériu Agrikultura no Peska (MAP) no Food and Agriculture Organization (FAO) hodi atualiza dadus pekuária, liuliu fahi nian.

“Kona-ba dadus ba fahi sira ne’ebé maka foin lalais kona virus hodi hamate hotu, tanba sensu hotu tiha maka foin mate, entaun sensu ne’e hatudu dadus iha ona, tanba ne’e maka ami sei serbisu hamutuk ho MAP no FAO sira, keta iha dadus administrativu relasiona ho fahi mate ne’e depois maka bele ajusta ba malu, no ami esklarese katak sensu halo tiha maka fahi mate”, Elias dos Santos ba TATOLI iha Caicoli, ohin.

Diretór Jerál Estatístika ne’e afirma ekipa Sensu Agríkola sei la tun fali bá terrenu hodi rekolla dadus, maibé nafatin utiliza dadus ne’ebé iha, tanba ekipa finaliza tiha sensu maka foin akontese fahi mate.

Relasiona ba progresu Sensu Agrikultura nian remata ona iha 31 outubru 2019, no dadaun ne’e tama iha faze hamoos dadus ou clearing data no tuir planu sei fó sai rezultadu prelimináriu iha abríl 2020.

Dadus husi sensu nian maioria tama ona iha nasionál no tuir loloos iha fin janeiru ne’e atu iha ona rezultadu prelimináriu.

“Más seidauk bele tanba sensu ne’e loloos hotu iha loron 2 outubru, maibé estende tan to’o 31 outubru razaun tanba ami kontrata ho empreza Telemor iha loron 12 agustu to’o 12 outubru ne’e ami uza internét gratuita hosi suku sira haruka mai nasionál ho lais, maibé to’o 12 outubru kontratu hotu, agora daudaun ne’e ami tenki hein fali ida ne’ebé ami estende hodi lori hotu dadus sira ne’e mai nasionál para ami bele kópia iha android ne’e ida-ida”, katak.

Diretór Jerál ne’e dehan dadus hosi munisípiu haruka mai hotu ona, falta de’it Lautem no data balu iha ona, no planu ba tabulasaun finál no preleminária prepara hotu ona no iha ona dadus provizóriu, maibé seidauk bele divulga tanba sei kompila hela hafoin publika.

Notísia relevante : Dadus Sensu Agríkola Presiza Revee Molok Halo Lansamentu iha Abríl

“Agora daudaun ami-nia ekipa bá ona halo enserramentu ba Sensu Agrikultura ho objetivu husu obrigadu ba autoridade lokál sira, entrevistadór, no fahe serifikadu ba sira”, katak.

Antes ne’e, Ministru Agrikultura no Peska (MAP), Joaquim José Gusmão dos Reis Martins, hateten dadus sensu agríkola tenke revee molok lansa iha abríl 2020, tanba bailoron naruk no Peste Suína Afrikana (ASF, sigla portugés) ne’ebé foin akontese halo animál barak maka mate.

“Animál hirak ne’ebé mate balun tanba bailoro naruk no moras ASF, dadus ida ne’e tenke revee tanba ita iha margin of error ne’ebé iha”, dehan.

Tuir dadus hosi husi ekipa task force, liña ministeriál nian katak ASF hahú menus ona hafoin hamate fahi rihun 16 iha territóriu Timor-Leste hahú husi jullu to’o novembru 2019.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here