Prezidente Komisaun Organizadora ba Komemorasaun Loron Transformasaun FALINTIL ba F-FDTL, Kapitaun Fragata, Adão Brtito “Zecky” ho ekipa hala’o konferénsia imprensa iha Kuartél Jenerál F-FDTL. Imajen/Eugénio Pereira

DILI, 29 janeiru 2020 (TATOLI)- Komandu FALINTIL-Forsa Defeza Timor-Leste (F-FDTL) sei hala’o promosaun diviza ba membru Ofisiál  Superiór sira hodi fó kontribuisaun ba dezenvolvimentu Instituisaun F-FDTL.

Notísia Relevante : F-FDTL Kontinua Tane Lema FALINTIL, “Povu Mak Bee, FALINTIL Mak Ikan”

Lista naran Ofisiál Superiór F-FDTL ne’e rasik, Komandu F-FDTL aprezenta ona ba Prezidente Repúblika, Francisco Guterres Lú Olo atu halo promosaun iha selebrasaun loron aniversáriu  Transformasaun FALINTIL ba F-FDTL ba dala-19  (20 fevereiru 2001-20 fevereiru 2020) liu husi parede militár iha Kuartél Jenerál F-FDTL iha  Fatuhada, Dili, domingu (02/02/2020).

Prezidente Komisaun Organizadora ba Komemorasaun Loron Transformasaun FALINTIL ba F-FDTL, Kapitaun Fragata, Adão Brito “Zecky” informa, lista promosaun diviza ba ofisiál superiór sira ne’e kompostu husi tenente koronél promove ba koronél, no majór sei promove ba tenente koronél.

Lista naran promovidu sira ne’e ekipa seidauk bele fó sai naran, tanba sei hein desizaun altu husi Prezidente Repúblika no Xefe Estadu Maiór F-FDTL, Majór Jenerál Lere Anan Timur.

“Agora primeiru faze sei halo de’it promosaun diviza ba ofisiál superiór balun, no balun sei halo iha fulan agostu 2020,”  hateten Zecky ba jornalista liu husi konferénsia imprensa iha salaun enkontru Kuartél Jenerál F-FDTL.

Eis Komandante Komponente Navál F-FDTL ne’e dehan, totál lista promosaun diviza ne’e Komandu F-FDTL halo hodi valoriza  membru  sira kontribuisaun ba Instituisaun F-FDTL.

Iha parte seluk, Zecy informa, tinan ne’e mós Komandu F-FDTL seidauk bele aprova pedidu husi veteranu rezisténsia F-FDTL sira ne’ebé idade liu ona tinan 60 husu atu reforma, tanba sei hein prosesu revizaun ba Estatutu F-FDTL nian ne’ebé Ministru Defeza, Filomeno da Paixão de Jesus, aprezenta ona ba Konsellu Ministru.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here