Prezidente Komisaun E Parlamentu Nasionál (PN), Abel Pires. Imajen Tatoli/Egas Cristovão.

DILI, 29 janeiru 2020 (TATOLI)—Reprezentante povu iha Uma-Fukun Parlamentu Nasionál, husu Governu halo intervensaun ba inundasaun, nune’e tempu udan ema labele mate tanba inundasaun.

“Solusaun maka halo intervensaun, Governu tenke iha meiu no kapasidade tomak entermu rekursu atu halo buat ruma tanba Governu iha diresaun oioin. Ita hein katak tinan oin la akontese tan inundasaun tanba ita triste feto oan ida mate. Se ida-ne’e ita la halo intervensaun, tinan oin sei akontese nafatin”, Prezidente Komisaun E (trata Asuntu Infraestrutura), Deputadu Abel Pires da Silva ba jornalista sira, iha resintu Parlamentu Nasionál, kuarta ne’e.

Reprezentante povu ne’e husu Ministériu Obra Públika presiza halo prevensaun ba inundasaun, tanba kada tinan udan tenke mai, labele fó sala fali udan.

“Agora meiu saida maka ita halo hodi prevene inundasaun ne’e. Se to’o udan tiha maka ita ba ke’e baleta ne’e tarde. Ita tenke prevene iha tempu bailoron. Ne’e pasu di’ak atu hasai bee ne’e imediatamente, maibé furak liu hala’o durante bailoron nune’e kuandu udan mai ne’e ita laiha problema ona”, reprezentante povu ne’e fó hanoin ba Governu.

Deputadu Abel Pires, buka identifika fatin hirak ne’ebé risku ba dezastre no tau planu hodi deskobre fukun hosi inundasaun ne’e.

Deputadu ne’e fó hanoin ba Governu katak bainhira identifika ona risku tama fulan-jullu hanesan ne’e, tenke fó ona solusaun ba fatin risku sira ne’ebé identifikadu.

Nia dehan, ordenamentu sidade Dili ne’e solusaun ba tempu naruk tanba presiza baze legál sira maibé haree ba situasaun ne’ebé urjente ne’e tenke halo kedas.

Entretantu, membru Komisaun E, Fabião de Oliveira, hateten Governu labele hein tempu udan maka hakfodak ba ke’e baleta, maibé tenke ho planu ne’ebé konkreta.

“Ita triste tanba ita-nia ema mate tanba inundasaun. Governu tenke haree ida-ne’e hanesan asuntu sériu. Ita espera tinan oin labele akontese tan situasaun hanesan ne’e”, deputadu Bankada Opozisaun ne’e tenik.

Antes ne’e, asuntu inundasaun ne’e Parlamentu Nasionál tau ona iha ajenda atu bolu Ministériu Obra Públika iha tersa semana oin para bele buka solusaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here