Embaixadór na'in-sia hasai foto hamutuk ho eis Primeiru-Ministru, Marí Alkatiri, hafoin enkontru. Imajen Tatoli/Hortençio Sanchez

DILI, 29 janeiru 2020 (TATOLI)–Iha kuarta ne’e, embaixadór na’in-sia ne’ebé tersa horisehik simu pose hosi Prezidente Repúblika, hasoru-malu ho eis Primeiru-Ministru (PM), Marí Alkatiri hodi rona opiniaun molok hala’o misaun diplomasia.

“Hasoru-malu ida-ne’e inisiativa ida hosi ami embaixadór sira-ne’e atu hatudu ba povu no mundu katak sai embaixadór hodi reprezenta Estadu hanesan mós lalatak. Entaun, ami tenke hasoru malu ho ita-nia eis titulár sira atu sira mós bele fó sira-nia hanoin oinsá bá iha ne’ebá ne’e ita bele serbisu ho maduru nune’e bele fó rezultadu ne’ebé di’ak,” Embaixadór Timor-Leste ba Cambodia, Hermenegildo ‘Kupa’ dehan ba jornalista sira, iha Faról, Dili, kuarta ne’e.

Nia tenik, sente kontente tanba hasoru-malu ne’e iha rezultadu ne’ebé pozitivu tanba eis titulár ne’e hato’o esperiénsia ne’ebé di’ak ba sira.

Lee mós: PM Enkoraja Embaixadór Foun Sira Hala’o Knaar ho Responsabilidade no Lealdade

“Ohin, hasoru malu ho Dr. Alkatiri ne’e kapa’as tebes. Ne’ebé, nia fahe esperiénsia ida mai ami nu’udar aman ida importante tebes. Nia fó hanoin mai ami maka atu bá ne’e bele identifika potensialidade kada nasaun diferente ne’e saida maka iha atu ba futuru bele fó mós benefísiu ba Timor-Leste,” nia haklaken.

Aleinde enkontru ho Marí Alkatiri, sira mós sei hasoru-malu ho eis titulár seluk hanesan José Ramos Horta iha 3 fevereiru mai ne’e. Sei hasoru mós Parlamentu Nasionál no parte relevante hotu atu husu opiniaun hafoin aranka hodi hala’o knaar.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here