Sesaun plenária Parlamentu Nasionál. Imajen/TATOLI

DILI, 29 janeiru 2020 (TATOLI)—Parlamentu Nasionál (PN) adia debate kona-ba virus Corona no inundasaun ba semana oin tanba oras ne’e Komisaun Espesializada sira preokupadu ho atividade fiskalizasaun.

Prezidente Parlamentu Nasionál (PPN), Arão Noé de Jesus da Costa Amaral, esplika loloos ne’e asuntu virus Corona no inundasaun konvoka plenária ho karáter urjénsia ho ministériu balun.

Asuntu ne’e sai preokupasaun iha Parlamentu Nasionál hafoin Xefe Bankada Parlamentár FRETILIN, Aniceto Guterres hatama rekerimentu husu debate asuntu rua ho karáter urjénsia.

Lee mós: PN Sei Debate Virus Corona no Inundasaun ho Karáter Urjénsia

Prezidente Parlamentu Nasionál, Arão Noé haruka ona karta ba Primeriu-Ministru, Taur Matan Ruak, hodi bele autoriza membru Governu ne’ebé tutela bá esplika iha plenária Parlamentu Nasionál kona-ba prevensaun moras Corona no prevensaun inundasaun.

Parlamentu Nasionál bolu Ministériu Negósiu Estranjeiru no Kooperasaun, Ministériu Saúde no Ministériu Defeza no Seguransa, hodi hanoin lisuk kona-ba virus Corona.

Purtantu, Ministériu Obra Públika no Ministériu Solidariedade Sosiál, sei diskute kona-ba asuntu inundasaun ne’ebé sai preokupasaun iha sidadde Dili.

Maibé, Xefe Governu fó resposta ba Parlamentu Nasionál, katak ohin hosi Governu labele partisipa tanba reuniaun Konsellu Ministru, ministru sira ladún barak, membru Governu sira balun seidauk toma pose, entaun se ministru rua ka tolu bá tiha Parlamentu partisipa debate ne’e entaun quorum laiha ba deliberasaun Konsellu Ministru nian.

“Ho razaun ida-ne’e Primeiru-Ministru propoin fali 29 no 30 janeiru, maibé komu ami haree atividade Komisaun Parlamentu nian ne’ebé daudaun ne’e atu hala’o knaar fiskalizasaun. Ami haruka fali karta ba Primeiru-Ministru katak bele adia filafali ba segunda ho tersa mai ne’e. Virus Corona nian liga ho Ministru Saúde, Ministru Negósiu Estranjeiru no Kooperasaun ho tan Ministru Defeza no Seguransa”, PPN, Arão Noé informa ba jornalista sira, iha Parlamentu Nasionál, kuarta ne’e.

Nia dehan, ministériu ne’ebé haree ba asuntu virus Corona haree oinsá atu transfere bolseiru timoroan sira hosi sidade Wuhan, Xina, no oinsá halo prevensaun hola mákina hodi deteta moras sira-ne’e.

“Kona-ba dezastre naturál ho Ministru Obra Públika, Ministra Solidariedade Sosiál koa’lia ba dezastre ruma nia atendimentu oinsá no Sekretaria Estadu Meiu Ambiente nian. Ida-ne’e mak ami-nia programa. Tan ne’e maka atu informa de’it katak loloos ne’e debate tiha ona maibé tanba razaun Primeiru-Ministru nian importante no Parlamentu oras ne’e mós preokupadu ho atividade fiskalizasaun”, nia katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here