Vise-Ministra Finansa, Sara Lobo Brites akompaña husi Diretór Jéral Alfândega, José António Fátima Abílio ho funsionáriu Alfândega ko'a hela dosi aniversáriu AA nian ba dala-20, tersa, 28 janeiru 2020. Imajen/Mídia MF.

DILI, 29 janeiru 2020 (TATOLI) – Ministra Finansa ein funsaun, Sara Lobo Brites, iha aniversáriu Autoridade Aduaneira (AA) ba dala-20 hatete Alfándega refleta ona lema husi Organizasaun Mundiál Alfándega (OMA).

Atuál Vise-Ministra Finansa afirma Alfándega nu’udar instituisaun ida importante tebes, iha mandatu eskluzivu ho pozisaun iha fronteira ne’ebé dezempeña knaar ida esensiál, nune’e funsionáriu sira hanesan parte hosi OMS iha oportunidade atu hatudu nia esforsu no atividade, serbisu ho dedikasaun, responsabilidade hodi bele garante futuru ida sustentavel, seguru no inkluzivu ba hothotu.

Tanba ne’e, iha selebrasaun loron AA nian atu refleta lema ne’ebé OMA define ba 2020 “Alfándega mak promove sustentabilidade ba ema, prosperiedade no planeta” mak Alfándega Timor-Leste mai ho lema “Utiliza sistema ASYCUDA World hodi fasilita komérsiu, simplifika prosesu, fasilita kontrolu, redús empregu, garante transparénsia no arrekada reseita”.

Governante ne’e rekoñese katak instituisaun Estadu ne’e hasoru dezafiu oioin, maibé husu atu hotu-hotu tenke hamriik metin nafatin no kontinua halo esforsu hodi responde liu ba dezafiu sira ne’e, iha kontestu kontribuisaun hosi Alfándega ba sustentabilidade.

“Ha’u bele fó ezemplu, serbí ba povu hodi harii sosiedade ida seguru no protejidu, Alfándega dezempeña papél krítiku ba implementasaun ba regulamentu ne’ebé aborda sobre prinsipál dezafiu, sosiál, ekonómika ne’ebé sosiedade hothotu iha mundu enfrenta hela”, Sara Lobo afirma iha ámbitu aniversáriu AA nian no loron mundiál Alfándega ne’ebé hala’o iha antigu edifísiu Portu Dili, tersa ne’e.

Durante ne’e, AA halo protesaun ba merkadoria ne’ebé tama iha rai-laran no buka esforsu luta kontra krime organizada, tranzasionál (hanesan; droga, arma no fase osan, no krime grave sira seluk) ne’ebé viola regulamentu hodi tama iha Timor-Leste.

Aktu sira ne’ebé Alfándega halo, atubele garante komérsiu internasionál, fó apoiu ba sosiedade no garante ekonomia ida prósperu, sustentavel no reziliente.

Hodi dehan Alfándega mós tenke kontinua otimista iha ninia operasaun hodi redús tempu no kustu ba movimentasaun merkadoria iha fronteira hodi bele estimula atividade komersiál hodi aumenta renda no empregu no mós promove investimentu nasionál no estranjeiru.

Aléinde ne’e melloria no efikásia iha fronteira sei kontribui ba kompetitividade hosi operadór komersiál, katak Alfándega kontribui atu fortalese governasaun no estabilidade. Bainhira adota asaun ne’ebé forte kontra fraude komersiál, bele mós garante ba Governu atu iha kbiit liuliu kona-ba reseita hodi finansia fali infraestrutura no servisu públiku no iha kontestu ambientál proteje Timor-Leste no garante sustentabilidade futuru jerasaun.

Sara Lobo Brites subliña, Alfándega bele kontribui liuhosi luta kontra mudansa klimátika hodi fornese sustentabilidade ambientál hodi fó apoia ba implementasaun efetiva hosi akordu oioin ne’ebé maka ligadu ho ambientál multilaterál, ne’ebé ninia objetivu inklui aborda komérsiu ilísitu, produtu ne’ebé perigozu, kombate hasoru ilísitu ba espésie sira ne’ebé fó ameasa ba moras sira ne’ebé mai hosi ai-horis ka animál hanesan espésie ezótika sira.

Nune’e, iha loron AA nian, Sara Lobo Brites hato’o parabéns ba família boot Alfándega no iha esperansa katak sei serbí nasaun ho responsabilidade, profisionalizmu, integridade no transparénsia, nune’e povu bele moris di’ak liután.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here