Reitór UNPAZ eleitu, Adolmando Soares Amaral. Foto TATOLI/Tomé Amado

DILI, 28 janeiru 2020 (TATOLI)-Reitór Universidade da Paz (UNPAZ), Adolmando Soares Amaral hateten, Universidade da Paz foin dada’uk lansa sistema online akadémiku haat (4) ba atendimentu estudante sira ho ámbitu halo fasil serbisu funsionáriu nian no mós tempu ba estudante sira.

“Programa primeiru husi sistema online haat ne’e, ida mak sistema online atendimentu ba estudante, liuliu iha prosesu rejistrasaun, orientasaun akadémika ba priense no haree sira-nia Kartu Rencana Studi (KRS),” Reitór UNPAZ, Adolmando Soares Amaral, ba Agênsia TATOLI iha nia kna’ar fatin, ohin.

Nia informa, hafoin lansa sistema online akadémiku refere UNPAZ hanaran sistema atendimentu estudante ne’e halo fasil liu serbisu funsionáriu no estudante sira para iha fatin ne’ebé de’it sira bele asesu.

Naran katak, nia dehan, estudante sira-nia Smart Phone ne’e asesu ba internete tama ba portál online atendimentu ne’e, sira bele priense ona sira-nia Kartu Rencana Studi (KRS) no estudante sira la presiza mai to’o iha kampus.

Sistema online akadémiku daruak,  nia haktuir, mak sistema online iha finansiamentu ne’ebé bele fasilita estudante sira bele ba loke sira ida-idak nia konta bankaria iha banku ne’ebé sira hili.

Ho nune’e, tuir nia, estudante sira-nia inan-aman haruka osan ba konta bankaria karik, to’o tempu kuandu estudante sira halo rejistrasaun para tuir ezame, sira deduksi de’it iha ne’eba liuhusi sistema online ba finansa ne’ebé universidade kria.

“Uza sistema  nune’e para inan-aman sira mós fasil atu kontrola osan hira mak selu ona. Selu ba saida? No, sira bele asesu de’it iha online, sira bele hatene ona osan sira ne’e uza ba saida-saida de’it,” nia dehan.

Nia reforsa, sistema datoluk mak sistema online ba serbisu funsionáriu no dosente sira nian ne’e kona-ba materia hotu-hotu husi dosente sira ida-idak ne’ebé universidade sentraliza ona iha biblioteka online.

“Agora dada’uk matéria hotu-hotu husi dosente ida-idak, ami sentraliza iha Biblioteka online. Depois, iha ne’ebá, estudante sira bele asesu ona oráriu eskola nian no bele hatene ona sira-nia dosente orientadór akademika ne’e mak sé,” nia haklaken.

Bainhira estudante sira loke iha online ne’e, nia dehan,  automatikamente estudante sira priense sira-nia Kartu Hasil Studi (KHS) no Kartu Rencana Studi (KRS), sistema simu direta ona tanba iha servidór (server).

Sistema dahaat, nia informa, sistema online ba Fasilidade no parte universidade tau ona no iha servidór rasik ne’ebé serbisu hamutuk ho Timor Telecom (TT) para ba aliña internete.

“Depois sistema iha UNPAZ ami só hetan de’it fornesimentu kona-ba liña internete husi Timor Telecom tanba ami halo parseiru ona. Simu kontratu ho sira para sira bele oferese liña internete ba universidade para ami-nia sistema online sira ne’e bele funsiona normál,” nia haklaken.

Entretantu, kona-ba rekursu umanu, nia hatutan, durante ne’e parte universidade investe no haruka ona ema ba tuir formasaun hodi ba hasai kursu iha área ida ne’e iha Universidade Duta Wacana Jogjakarta, Indonézia.

“Agora dadauk iha sira na’in haat (4) ne’ebé preparadu loos ona ba ida ne’e. Agora dadauk sira mak serbisu iha server no halo hela liña internete ba fakuldade programa de estudu ba estudante sira, bele asesu no priense buat sira ne’e liuhusi online,” nia hateten.

Nia dehan, matéria ba Biblioteka Online ne’e agora daudauk iha semester impar (ganjil) iha semester I, III, V, no semester VII, materia sira ne’ebé mosu iha online ne’e, parte universidade husu ba dosente sira ne’e ninia file eletrónika sira hodi hatama ba servidór para estudante sira bele asesu.

Kona-ba biblioteka online, nia dehan, dosente sira tenke  kontribui fó jornál internasionál liuliu dosente sira ne’ebé ramata sira-nia kursu Maestradu, Doutoramentu iha rai liur.

“Sira agora mai ne’e, ami husu ema ida fó jornál atus ida ba iha biblioteka online. Ne’ebé, ami-nia jornál internasionál sira ne’ebé foun. Ne’ebé, ami hetan ami fó ba iha server para hatama iha biblioteka online ne’e para ami-nia estudante sira bele asesu iha ne’ebá,” nia dehan.

Nia esplika, métodu estudante sira atu asesu biblioteka online ne’e mak estudante sira iha password maibé password ne’e uza estudante sira-nia NIM rasik no sira-nia user ne’e tau sira-nia naran para sira bele asesu informasaun liuhusi komputadór no smarth phone.

Reitór UNPAZ ne’e reforsa, agora dadauk iha laboratóriu rua iha Munisipiu Liquiça ba Fakuldade Teknologia Agrikola no Enjiñaria ne’ebé monta ona komputadór sira para  estudante sira labele asesu internete husi sira-nia Smart Phone ba iha fasilidade kampus nian.

“Agora dadauk serbisu manuál sei la’o hela tanba online ne’e estudante barak seidauk toman no halo operasaun ba portál biblioteka online. Ne’ebé, ami tenta nafatin fahe no fó informasaun loro-loron ba sira liuhusi dirasaun IT nian kona-ba oinsá no fó nafatin sira-nia username, sira bele asesu portal ba biblioteka online,” nia esplika.

Entretantu, nia dehan, iha sistema online ne’e rasik estudante sira uza hahú kedas iha semester primeiru, terseiru, pois ba semester quinto no sete. Sistema online sei atende ba estudante sira uza sistema online.

Jornalista : Nelia Fernandes

Editór         : Rafy Belo

1 KOMENTÁRIU

HAKEREK NO HATÁN

Please enter your comment!
Please enter your name here