Tribunal Distritál Dili. Imajen/TATOLI

DILI, 28 janeiru 2020 (TATOLI) – Tribunal Distritál Dili (TDD), ohin, hala’o julgamentu kazu krime insestu ne’ebé komete husi arguido BSM hasoru nia feton NSM.

Faktu ne’ebé arrola husi Ministériu Públiku  (MP) katak, iha loron 14 abríl 2018, tuku 11:00 Otl,  iha Ermera, lezada NSM nu’udar arguido nia feton hamriik hela iha arguido nia kuartu oin. Derrepente de’it, arguido husi kotuk rasta lezada no aperta lezada nia kakorok hodi soe sa’e ba kama laran obriga hasai lezada nia ropa no halo relasaun seksuál.

Iha momentu ne’e, lezada hakilar tanba  sente moras, maibé arguido buti metin lezada hodi espresa nia vontade seksuál ba nia feton rasik.

Liu tiha minutu balun nia laran, arguido ameasa kedas nia feton hodi dehan, la bele hatete sai ba ema ruma ou família. Se, hateten sai maka nia bele oho lezada

Iha fali loron 12 abríl 2018, arguido kontinua fali ho nia aktu ne’e hodi obriga rasta nia feton tama ba kuartu laran halo relasaun seksuál. Ba dala rua ne’e mós lezada ta’uk atu fó hatene ba nia família tanba nia maun hanesan arguido ameasa atu oho nia.

Iha 25 abríl 2018, lezada ba fali arguido nia kioske atu sosa ABC moka bainhira lezada to’o iha kioske lezada fó osan $0.25 atu sosa ABC moka arguido simu tiha osan rai iha meza leten haruka lezada tama ba foti rasik moka, nune’e lezada mós tama ba kioske nia laran  atu foti moka, maibé arguido hamriik taka tiha odamatan ho janela kioske nian no dada lezada tama ba nia inan aman nia kuartu arguido halo hikas relasaun seksuál.

La sente, lezada isin rua fulan lima ona maka foin fó hatene ba nia inan ho nia tian ho tiun katak arguido BSM nu’udar nia maun maka halo nia isin rua.

Iha 23 dezembru 2018, lezada ho família sira bolu arguido atu rezolve, maibé arguido fila baku fali lezada, família hato’o keixa iha polisia depois kontinua lori kedas lezada ba uma mahon too agora.

Lezada nia oan moris iha uma mahon iha loron 30 dezembru 2018 no  tanba kazu ne lezada para tiha nia estudu durante tinan ida, mezmu iha uma mahon maibé lezada sente ta’uk no trauma uluk arguido ameasa
atu oho.

Arguido BSM nu’udar autór material ho forma konsumada hodi pratika konkursu krime tolu ne’ebé previstu no punidu iha artigu 172 ,35 no 1 kódigu penal Timor-Leste.

Arguido BSM sujeitu ona ba TIR tuir artigu 186 kódigu penal no solisita ba tribunal atu mantein medida koasaun ne’e tanba adekuadu no proporsionál ona
kumpre artigu 237 no 238 hosi kódigu penal  hodi halo notifikasaun legal no remete auto ne’e ba tribunal atu halo distribuisaun ba julgamentu.

Audiénsia julgamentu ne’e adia ikas ba loron 11 juñu 2020, tuku 09:00 dadeer.  Prosesu julgamentu ne’e prezide husi juis koletivu Antonio do Carmo, Ministériu Públiku reprezenta prokuradór estaziadu no arguido hetan asisténsia legal husi defensór públiku Eustaquio Guterres.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here