Foto/Google.

DILI, 28 janeiru 2020 (TATOLI) – Banku Nasionál Komérsiu Timor-Leste (BNCTL, sigla portugés) fó ona kréditu hamutuk millaun $57,4 ba kliente hamutuk 10,039 iha 2019.

“BNCTL fó ona kréditu hamutuk millaun $57 ba populasaun iha tipu kréditu oioin”, Prezidente Konsellu Administrasaun BNCTL, Brígido de Sousa, ba TATOLI iha Timor Plaza, segunda ne’e.

Tipu kréditu sira ne’e hanesan mikro kréditu, grupu kréditu iha agrikultura, finansiamentu ba projetu, negósiu jerál hanesan halo loja, karpintaria, mekánika, restaurante, otelaria, no kréditu konsuntivu.

“Jurus ne’ebé BNCTL aplika bazeia ba avaliasaun kada proposta ne’ebé tama, hanesan ba investimentu sira konsidera ki’ik, hanesan apoia populasaun para hola tratór ou mákina dulas kafé, ou sosa mákina peska nian, kuda modo, entaun banku aplika porsentu neen, ba investimentu boot uitoan entre porsentu 8-10, ba funsionáriu depende katak sira kleur ona ho BNCTL no lealdade katak kréditu to’o dala haat ona banku bele konsidera hatún no jurus normál ne’e porsentu 12, maibé ba sira ne’ebé kleur bele hatún ba porsentu 11 ou 10”, Brígido esplika.

Prezidente ne’e esklarese hosi kréditu ne’ebé BNCTL fó iha tinan kotuk no kréditu sira ne’ebé antes konsidera ativu hela iha 2019, BNCTL hetan rendimentu kuaze millaun $8.

Brígido esplika, BNCTL nu’udar banku Timór nian no foin maka tinan sia, entaun banku ne’e iha rede mós boot iha territóriu hotu, tan ne’e iha tinan hira mai ne’e iha baze ida investe iha área oioin hanesan iha teknolojia, rekursu, kapasitasaun, signifika katak kustu mós aas, tanba hatene katak Timór ne’e buat hothotu la’ós baratu, eletrisidade karun, bee, satán banku ne’e depende tebetebes ba liña internét, tanba ne’e kontribui makaas mós kustu, depois funsionáriu banku nian 300-resin.

Hodi dehan iha 2019, totál rendimentu operasionál no la’ós operasionál ne’e maizumenus besik millaun $13, maibé kustu operasionál de’it kuaze millaun $10, ne’ebé rezultadu negósiu BNCTL hetan besik millaun $2,4.

“Iha 2019 ne’e, ami-nia trajetu hakarak atu to’o millaun $3, maibé tanba balu la konsege atinje, iha mós kréditu balu konsidera mál paradu liuliu kréditu ba finansia projetu, tanba iha situasaun polítika ami tenke halo rezerva, entaun kustu hotu hamutuk millaun $1,3, ida ne’e maka BNCTL labele atinje nia alvu ba lukru nian”, katak.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here