DILI, 28 janeiru 2020 (TATOLI)—Preferénsia hosi organizasaun Resistência Nacional dos Estudantes de Timor-Leste (RENETIL), lakohi Eleisaun Antesipada (EA).

Ekipa RENETIL hato’o pozisaun ne’e hafoin hasoru-malu ho Sekretáriu Jerál FRETILIN, Marí Alkatiri, hodi ko’alia kona-ba situasaun polítika atuál.

Sekretáriu Jerál RENETIL, Joaquim Fonseca, hato’o pontu importante ba Sekretáriu Jerál FRETILIN, Marí Alkatiri maka atu tetu didi’ak buat hotu-hotu iha situasaun ida agora.

Fonseca dehan, líder partidu polítiku sira labele foti desizaun ida-ne’ebé prejudika tan povu nia moris.

“Akresenta liután se iha dalan seluk di’akliu foti molok halai ba Eleisaun Antesipada, tanba Eleisaun Antesipada ne’e kustu boot maka foin hahoris Governu foun ida. Di’akliu ezgota lai. Posibilidade seluk, alternativa seluk forma Governu ida-ne’ebé ke bele fó resposta ba situasaun agora iha ita-nia rain”, Joaquim ba jornalista sira, hafoin hasoru-malu ho Sekretáriu Jerál FRETILIN, iha Gabinete Eis Titulár, Farol, Dili, tersa ne’e.

Sekretáriu Jerál RENETIL ne’e husu Sekretáriu Jerál FRETILIN, Marí Alaktiri atu buka malu ho líder sira seluk atu ko’alia ba malu ka diálogu.

“Se iha diferensa ruma bele ko’alia ba malu para klarifika tiha, nune’e bele iha entendimentu ba malu tanba líder sira sempre husu ba ita foin-sa’e sira atu hamutuk, entaun sira mós tenke rona malu no buka entende malu no diálogu”, Fonseca fó hanoin.

“Ami-nia preferénsia ne’e lalika iha Eleisaun Antesipada. Eleisaun Antesipada ne’e tenke sai últimu rekursu. Laiha tan dalan seluk ona, prontu, la’o ba iha ne’ebá. Maibé, atu halo Eleisaun Antesipada ne’e tenke haree tanba ida-ne’e ita eleisaun beibeik ona”, nia akresenta.

Nia argumenta, Eleisaun Antesipada ne’e lori fulan-lima ka fulan-neen hanesan ne’e maka hetan Governu foun ida, tanba tinan rua ekonomia la’o ladi’ak tanba impase polítika.

“Ha’u hanoin forma Governu ida-ne’ebé la’ós bazeia de’it ba rezultadu eleisaun, maibé Governu ida-ne’ebé bele koko estabiliza situasaun durante tinan rua nia laran. Oras ne’e, RENETIL halo hela audiénsia ho Prezidente Repúblika, Primeiru-Ministru, líder PLP, CNRT no líder sira seluk atu ko’alia kona-ba situasaun polítika ne’ebé kontinua iha inserteza.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here